ქვეყანაში არსებული ნარკოპოლიტიკა, “აიისა”, აქცია და კონტრაქცია, – “მეტრონომმა” “შენების მოძრაობის” ლიდერთან დავით უსუფაშვილთან ბლიც-ინტერვიუ ჩაწერა.
მეტრონომი: პირველ რიგში, ბოლოდროინდელი მოვლენები რომ შეგვიფასოთ – პარლამენტის წინ გამართული აქცია და მისი ორგანიზატორების მიერ მიღებული გადაწყვეტილებები…
დავით უსუფაშვილი: ამ პროცესში ყველაზე უფრო სახელმწიფოებრივად აქციის ორგანიზატორები მოიქცნენ. მათ სწორი პოზიცია დააფიქსირეს იმ გადაჭარბებული ძალების მიმართ, რომელიც კლუბებში ვიხილეთ. მეორე მხრივ, როდესაც აგრესიულად განწყობილი ადამიანების დიდი მასა სერიოზული პრობლემებით იმუქრებოდა, ვფიქრობ, აქციის შეწყვეტის შესახებ გადაწყვეტილება სწორი იყო. თუმცა, როგორც ვიცი, ისინი საკუთარი მოთხოვნების რეალიზების მცდელობას სხვა გზებით აგრძელებენ.
დანარჩენი რაც ვიხილეთ, ეს იყო სახელმწიფოებრიობისა და კანონის უზენაესობის დეფიციტი და სამწუხარო რეალობაა, ის რაც დღეს ქვეყანაშია. სახელისუფლებო უწყებები თავს არ თვლიან ვალდებულად პოლიტიკური მენეჯმენტი გაუწიონ პროცესებს. ორი დღე-ღამის განმავლობაში ხელისუფლება იყო მდუმარე პოზიციაში და მოქალაქეები საკუთარი გადაწყვეტილებების იმედად იყვნენ. რაც შეეხება შინაგან საქმეთა სამინისტროს, ამ უწყებამ შექმნა ეს პრობლემა და მერე ამავე უწყების ხელმძღვანელმა განმუხტა სიტუაცია. ასე რომ ჯობდა საერთოდ არ შეექმნა ეს სიტუაცია.
მეტრონომი: მოკლედ რომ შეგვიფასოთ “ქართული მარშის” ქმედებები..
უსუფაშვილი: ეს ასპექტი არის სრულიად გაუგებარი, რომ სახელისუფლებო რეაგირების გარეშეა დარჩენილი. ჩვენ ვიხილეთ უპრეცენტო მასშტაბის მოწოდებები ძალადობისა და სიძლვილისკენ, რაც უკვე სიმბოლიზმით იყო გაჟღენთილი. მათ შორის, ნაცისტური სიმბოლიზმითაც. გარდა ამისა, ჩვენ საქმე აქციასთან და კონტრაქციასთან არ გვქონდა. ჩვენ საქმე გვქონდა აქციასთან და მის დამრბევ მოქალაქეთა ჯგუფებთან. ამიტომ, პოლიციელთა მოქმედებები არ შეიძლება იყოს ერთნაირი. ერთ მხარეს მშვიდობიანი შეკრება იყო და მეორე მხარეს ძალადობის მცდელობა, რომელიც სისხლის სამართლის კოდექსით ისჯება.
მეტრონომი: 17 მაისი..
უსუფაშვილი: პირველ რიგში, უნდა ვიცოდეთ, რომ ამ ქვეყანაში ბევრი 17 მაისი მოვა და ყველას დიდხანს სიცოცხლეს ვუსურვებ, ამ დღის მომხრესაც და მოწინააღმდეგეებსაც. ამიტომ ჩვენ ამ ქვეყანაში თანაარსებობა უნდა ვისწავლოთ. არასოდეს არ იქნება, რომ ყველა ერთ ჭკუაზე იყოს, ერთნაირად ეზეიმობედს, აპროტესტებდეს ან მხარს უჭერდეს. ამიტომ, ჩვენ ერთმანეთს უნდა მივცეთ საშუალება, რომ ჩვენს ქვეყანაში ვიცხოვროთ თავისუფლად და ეს ყველამ უნდა შეიგნოს.
ეს ყველაფერი სახელმწიფო პოლიტიკის დონეზეა დასამკვიდრებელი. მხოლოდ მოქალაქეთა შეგნებით ასეთი რამ არ გვარდება. სამწუხარო რეალობაა, რომ ქვეყანაში ერთმანეთის მიუღებლობისა და სიძულვილის მუხტია დაგროვილი. ქვეყანაში უამრავი კონფლიქტია დაგროვილი, რომელიც თავის დროზე არ გადაწყდა. ეს არის ნაღმები, რომელზეც ვცხოვრობთ. პოლიტიკური წრეგადასული დაპირისპირებები პარლამენტსა და მის გარეთ, მოქალაქეებს აძლევს მაგალითს, რომ მათაც ასე უნდა გაარკვიონ ერთმანეთში ურთიერთობა. ეს არის მოსაგვარებელი.
მეტრონომი: რა ფიქრობთ მარიხუანას დეკრიმინალიზაციაზე და თავად თუ მოგიწევიათ?
უსუფაშვილი: საქართველოს ტერიტორიაზე სუფთა ვართ. სადაც ლეგალურია იქ გამისინჯავს, მაგრამ რომ გითხრათ დიდად მომეწონა-თქო არ იქნება მართალი.
ნარკოპოლიტიკის მხრივ, უნდა დავინახოთ რეალობა, რომელიც ძალიან მძიმეა და შედეგზე უნდა ვიყოთ ორიენტირებულები – რაც შეიძლება ნაკლები ადამიანი უნდა იყოს ნარკოდამოკიდებული და მეორე, რაც შეიძლება ნაკლები ადამიანი იყოს იმ საძალაუფლებო ცენტრების მსხვერპლი, რომელიც ნარკოტიკს იყენებს, როგორც მოქალაქეთა მორჩილებაში სამყოფ საშუალებას.
ცალსახაა, რომ არსებული ნარკოპოლიტიკა ამ ამოცანების გადასაჭრელად არაეფექტურია. ჩვენ გვაქვს მაღალი სასჯელები მოხმარებაზე, ჩვენ გვაქვს უამრავი რეგულაცია, მაგრამ შედეგი უარესდება. ამიტომ, მე ვარ მომხრე, რომ დამატებითი ღონისძიებები შემოვიტანოთ. ვფიქრობ, პარლამენტში ინიცირებული კანონპროექტი არ იყო ცუდი და კარგი იქნება თუ მალე გადავალთ ამ რელსებზე. ეს ნარკოტიკების ლეგალიზაცია არ არის. ეს არის მომხმარებლის სისხლის სამართლის წესით არ დასჯა. მე ვფიქრობ, ჩვენ ეს ინსტუმენტი უნდა ავამოქმედოთ.
მეტრონომი: მომავალ საპრეზიდენტო არჩევნებთან დაკავშირებით თუ მართავთ მოლაპარაკებებს საერთო კანდიდატთან დაკავშირებით?
უსუფაშვილი: ჩვენ 2-3 თვეა საჯარო დისკუსიაში ვართ იმის თაობაზე თუ როგორი პრეზიდენტი ჭირდება ქვეყანას და რა ამოცანების შემსრულებელი. ჩვენ არ ვსაუბრობთ იმაზე მე ვჯობივარ თუ სხვა, პიროვნება საქმიდან გამომდინარე უნდა შეირჩეს – რა საქმეა გასაკეთებელი უახლოესი 5 წლის განმავლობაში ქვეყანაში სახელმწიფოს მეთაურის პოსტზე.
სრულიად აშკარად იკვეთება ოპოზიციის ერთი ნაწილი, რომელიც თვლის, რომ პრეზიდენტის საქმე ახალი რევოლუციის ლიდერობა უნდა იყოს და რაც შეიძლება მალე დაამხოს ქვეყანაში “ოცნების” ხელისუფლება. მე არ ვფიქრობ, რომ ეს პრეზიდენტის ამოცანა უნდა იყოს. მეორე ნაწილი თვლის, რომ “ქართულ ოცნებას” ახალმა პრეზიდენტმა ნაკლებად უნდა მოუშალოს ნერვები და მე არც ამას ვეთანხმები. ამიტომ, ვერც მათთან მექნება მოლაპარაკებები.
ყველა ვინც თვლის, რომ ქვეყანას ჭირდება გამაერთიანებელი სახელმწიფოს მეთაური, რომელიც პოლიტიკურ ძალებში კონსესუსის მაძიებელი იქნება და შეეძლება ყველა მოქალაქესთან და პოლიტიკურ ჯგუფთან საქმიანი მოალაპარაკებები გამართოს, ასეთი პრეზიდენტის მაძიებელ ადამიანებთან მზად ვარ მოლაპარაკებისთვის.
მეტრონომი: რას გვეტყვით “აიისაზე?”
უსუფაშვილი: თქვენ რომ ახლა კომპანიის მარკეტინგის წარმომადგენელი ყოთ, რომელიც პრეზერვატივზე ამ სიმბოლოების დახატვას აპირებდეთ და მე რჩევას მეკითხებოდეთ, გეტყოდით, რომ არ ღირს და არ იქნებოდა ამ მიმართულებით ჩემი პოზიცია დადებითი. იურიდიული მხარე სასამართლოშია გასარკვევი. არ ვფიქრობ, რომ ამითი ქვეყანა დაიქცა, მაგრამ ჯობს ცოტა მეტი ანგარიში გავუწიოთ ადამიანებმა ერთმანეთის განწყობებს. მგონია, რომ ყველაფრის მარკეტიზაცია სწორი არ არის, ეს ჩემი პერსონალური ხედვაა.
მეტრონომი: ივანიშვილი თუ სააკაშვილი?
უსუფაშვილი: ივანიშვილიც და სააკაშვილიც გამარჯვებული თავიანთ ოჯახებსა და ახლობლებში. რაც შეეხება ქვეყანას საქართველო და სამშობლო.
ავტორი: ბესო კუნელაური