“სამეგრელო ის რეგიონია, რომელმაც კარგად იცის როგორი იყო მაფიოზურ-კლანური, ძალადობრივი მმართველობა”- ამის შესახებ თბილისის მერმა კახა კალაძემ ზუგდიდში გამართულ რეგიონალურ კონფერენციაზე განაცხადა.
მისი თქმით, ძალიან რთული იყო აღნიშნული მმართველობის დროს განსხვავებული აზრის ხმამაღლა დაფიქსირება, თუმცა მოქმედმა მთავრობამ მისი თქმით, შეცვალა ძალადობრივი რეჟიმი.
“ძალიან რთული იყო მაშინ განსხვავებული აზრის ხმამაღლა დაფიქსირება, თუმცა სამშობლოს სიყვარულით თქვენ ეს შეძელით. ჩვენ ერთიანი ძალისხმევით მოვახერხეთ, შეგვეცვალა ძალადობრივი რეჟიმი.
ბოლო წლებში ძალიან ბევრი საინტერესო პროექტი განხორციელდა რეგიონში, თუმცა ჩვენი ქვეყნისთვის მთავარ გამოწვევად რჩება ეკონომიკური განვითარება. ქვეყანას სჭირდება ახალი სამუშაო ადგილები, ძლიერი ეკონომიკა უნდა გახდეს რეგიონების და ადგილობრივი თვითმმართველობების განვითარების საფუძველი.
ჩვენ უნდა ავაშენოთ დემოკრატიული სახელმწიფო, თავისუფალი მოქალაქეებით, სადაც კანონი იქნება უზენაესი. ამაში კი თითოეული მოქალაქის როლი არის განსაკუთრებული”- განაცხადა კალაძემ, რომლის კომენტარს მისი პრესსამსახური ავრცელებს.