სახელმწიფო სამსახურის პოლიტიკური პარტიების ფინანსური მონიტორინგის სამსახურის ანგარიშში ნათქვამია, რომ 2017 წლის ადგილობრივ თვითმმართველობის წინასაარჩევნო პერიოდში პოლიტიკურმა პარტიებმა 27 270 568 ლარი დახარჯეს.
აუდიტის სამსახურის ინფორმაციით, ანგარიში 2017 წლის 1 ივნისიდან 19 ნოემბრის ჩათვლით პერიოდს მოიცავს.
ანგარიშის თანახმად, საანგარიშო პერიოდში ყველაზე მეტი თანხა – 17 600 948 ლარი პარტიამ „ქართული ოცნება – დემოკრატიული საქართველო“ დახარჯა.
ამავე ანგარიშით, 2 078 378 ლარი დახარჯა „ერთიანმა ნაციონალურმა მოძრაობამ“, 1 523 360 ლარი – „საქართველოს პატრიოტთა ალიანსმა“, 1 484 891 ლარი – პარტიამ „ევროპული საქართველო-მოძრაობა თავისუფლებისთვის“.
რაც შეეხება შემოწირულებებს, აუდიტის სამსახურის ანგარიშის თანახმად, საარჩევნო სუბიექტების მიერ მიღებულმა შემოწირულებამ ჯამშჲ 16 418 892 ლარი შეადგინა.
ანგარიშის მიხედვით, ყველაზე მეტი შემოწირულება პარტიამ „ქართული ოცნება-დემოკრატიული საქართველო“ მიიღო – 14 815 653 ლარი, რომელსაც მოსდევს „ევროპული საქართველო-მოძრაობა თავისუფლებისთვის“ – 951 834 ლარი, „ერთიანი ნაციონალური მოძრაობა“ – 122 496 ლარი, „საქართველოს პატრიოტთა ალიანსი“ – 66 392 ლარი.