კატალონიის ავტონომიის რეგიონული მთავრობა მომავალ ორშაბათს, საპარლამენტო სესიაზე დამოუკიდებლობის გამოცხადებას გეგმავდა. ამასთან დაკავშირებით, ესპანეთის საკონსტიტუციო სასამართლომ კატალონიის პარლამენტის ორშაბათს დაგეგმილი სესია შეაჩერა.
ესპანეთის პრემიერ-მინისტრი, მარიანო რახოი კი კატალონიის მეთაურს, კარლეს პუიჩდემონს მოუწოდებს, დაუბრუნდეს კანონის ჩარჩოებს და უარი თქვას დამოუკიდებლობის გამოცხადებაზე.
შეგახსნებთ, კატალონიის დამოუკიდებლობის შესახებ ე.წ. რეფერენდუმი 1-ელ ოქტომბერს ჩატარდა. რეფერენდუმს მხარს არ უჭერს ესპანეთის მთავრობა და მას არაკონსტიტუციურად აცხადებს. კატალონიის მთავრობის მიერ გავრცელებული ინფორმაციით, ე.წ. რეფერენდუმში მონაწილეობა 2,2 მილიონმა ადამიანმა მიიღო, უმრავლესობამ კი ხმა დამოუკიდებლობის გამოცხადებას მისცა.