საქართველოს მესამე პრეზიდენტის და ოდესის ოლქის ყოფილი გუბერნატორის, მიხეილ სააკაშვილის სასამართლო სხდომა დღეს მოგვიანებით გაიმართება, – ინფორმაციას თავად სააკაშვილი ავრცელებს.
”ახლა ქალაქ მოსტისკაში მივემგზავრები, სადაც დღეს, ჩემი სახლში დაბრუნების საქმის განხილვა უნდა გაიმართოს, მაგრამ მე შემატყობინეს, რომ სასამართლო სხდომა გადაიდო და 16:15 საათზე გაიმართება.
როგორც ჩანს, მათ ჯერ ამ ”საუკუნის დანაშაულის” ყველა მტკიცებულების შეგროვება ვერ მოასწრეს. რას ვიზამთ, დაველოდები, მთავარია, რომ მშობლიურ მიწაზე ვარ”, – წერს მიხეილ სააკაშვილი.
სასამართლო სხდომა ლვოვის ოლქის ქალაქ მოსტისკაში გაიმართება, სადაც განიხილება მოქალაქეობის არმქონე მიხეილ სააკაშვილის მიერ უკრაინის საზღვრის გადაკვეთა.