ე.წ. ციანიდის საქმის მთავარმა მოწმემ ირაკლი მამალაძემ საქართველო დატოვა. მისი თქმით, მას არ ჰქონდა უსაფრთხოების გარანტია და ვერ უძლებდა წნეხს.
„შეუძლებელია გაუძლო იმ წნეხს, ზეწოლას, რომელიც ჩემს მიმართ არის მომართული მედიასაშუალებების მხრიდან. საუბარი მაქვს „რუსთავი 2-ზე“ და იმ სრულიად გადაუმოწმებელ ინფორმაციაზე, რომელიც გავრცელდა ჩემს წინააღმდეგ. თითქოს პროვოკატორი ვყოფილვარ წინა წლებში, სააკაშვილის დროს. 2004 წელს „რუსთავი 2-ში“ ვმუშაობდი და საინტერესოა, ვისზე ვაგროვებდი კომპრომატებს“, – განაცხადა ირაკლი მამალაძემ “საზოგადოებრივთან” საუბრისას.