დილას ხულოში მეხის ჩამოვარდნას 22 წლის მამაკაცის სიცოცხლე ემსხვერპლა. ხულოს რაიონის გამგებლის, ბესიკ ბაუჩაძის განცხადებით, შემთხვევა სოფელ აგარის საზაფხულო იალაღზე მოხდა.
გამგებლის ინფორმაციით, უბედური შემთხვევა ტყეში მოხდა. მამ-შვილი შეშის მოსატანად იმყოფებოდნენ, როდესაც წვიმის დაწყების შემდეგ თავი ხეს შეფარეს. სწორედ ხეს დაეცა მეხი, რა დროსაც 22 წლის ახალგაზრდა ადგილზევე გარდაიცვალა.
„მამა-შვილი, ახლობლებთან ერთად, ტყეში შეშის მოსატანად იმყოფებოდა. ძლიერი წვიმის გამო, მათ თავი ხეს შეაფარეს. ხეს მოულოდნელად მეხი დაეცა, რის შედეგადაც 22 წლის ახალგაზრდა ადგილზე გარდაიცვალა“, – განაცხადა ბესიკ ბაუჩაძემ.
მისივე ინფორმაციით, გარდაცვლილი ახალგაზრდის თანმხლებ პირთაგან არავინ დაშავებულა.