„8 ოქტომბრის არჩევნებისთვის გამონაკლის შემთხვევაში შექმნილი 11 უბანი იმუშავებს“, – ამის შესახებ ცესკო-ს სპიკერმა ანა მიქელაძემ განაცხადა.
მისი თქმით, აღნიშნული 11 უბნიდან უმრავლესობა სასჯელაღსრულების სამინისტროს სტრუქტურულ ერთეულებში გაიხსნება. ჯამში, გამონაკლის შემთხვევაში შექმნილ 11 უბანზე დაახლოებით 3 000-მდე ამომრჩეველია რეგისტრირებული.
”საარჩევნო კანონმდებლობა არ იცნობს ტერმინს ”სპეციალური უბანი”. კანონმდებლობის თანახმად, მხოლოდ გამონაკლის შემთხვევაში შექმნილი საარჩევნო უბნები არსებობს. 2016 წლის 8 ოქტომბრის არჩევნებისთვის შექმნილია 11 გამონაკლის შემთხვევაში შექმნილი უბანი. კანონმდებლობაში დეტალურად არის გაწერილი იმ პირთა სია, ვინც გამონაკლის შემთხვევაში შექმნილ უბანზე ხმას აძლევს. მასში შედიან როგორც თავდაცვის სამინისტროს, ასევე შსს-ს, დაცვის, სპეცსამსახურის წარმომადგენლები და სხვა პირები. გამონაკლის შემთხვევაში შექმნილი 11 უბნიდან უმრავლესობა, 10 მათგანი გაიხსნება სასჯელაღსრულების სამინისტროს კონკრეტულ სტრუქტურულ ერთეულებში, ხოლო ერთი უბანი გაიხსნება ხონის სამკურნალო დაწესებულებაში”, – განაცხადა ანა მიქელაძემ.
როგორ მიქელაძემ განაცხადა, სამხედრო პირები ხმას მისცემენ საკუთარი დისლოკაციის ადგილების მიხედვით. იმ ოლქებში, სადაც მათი დანაყოფებია დისლოცირებული. სამხედროები ხმის მიცემის პროცედურაში მონაწილეობას მიიღებენ ჩვეულებრივ საარჩევნო უბნებზე.
ცესკოს სპიკერის განცხადებით, ამომრჩეველთა ერთიან სიაში 3 513 884 ამომრჩეველია რეგისტრირებული.