Atlantic Council-თან ინტერვიუში, საქართველოს პრემიერმა გიორგი კვირიკაშვილმა NATO-ში გაწევრიანების შესახებ ისაუბრა:
“საქართველოს ევროპული არჩევანი შეუქცევადია. საქართველოს მოსახლეობის დიდი უმრავლესობა განიხილავს ევროკავშირისა და NATO-ს წევრობას როგორც აუცილებლობას, რომელიც უზრუნველყოფს დემოკრატიის უფრო მაღალ სტანდარტებს, მშვიდობას და კეთილდღეობას როგორც ჩვენს ქვეყანაში, ისე მთლიანად რეგიონში. ჩვენი ხალხი მხარში უდგას მთავრობას ჩვენი ამბიციური რეფორმების გეგმის განხორციელებაში. ვიზების ლიბერალიზაცია საგრძნობ სარგებელს მოუტანს ჩვენს მოქალაქეებს, რომლებიც ერთსულოვნად უჭერენ მხარს ევროინტეგრაციას. გარდა ამისა, ეს თვალნათლივ დაანახებს ოკუპირებულ ტერიტორიებზე მცხოვრებ მოსახლეობას ევროპული და ევროატლანტიკური ინტეგრაციის უპირატესობებს. 8 ოქტომბერს საქართველოში ჩატარდება საპარლამენტო არჩევნები. მართალია, არჩევნების მონაწილე მთავარ პოლიტიკურ ძალებს შორის არის პოლიტიკურ აზრთა სხვადასხვაობა, მაგრამ ყველა ძირითადი პარტია ერთსულოვნად ემხრობა დასავლეთში შემდგომ ინტეგრაციას.
გარდა ამისა, ოცზე მეტი არასამთავრობო ორგანიზაცია გაერთიანდა კოალიციაში ევროატლანტიკური საქართველოსთვის. ბოლო რამდენიმე წლის განმავლობაში ჩვენ ჩავატარეთ წარმატებული საპრეზიდენტო და ადგილობრივი არჩევნები და წელს საპარლამენტო არჩევნებით ჩვენ დავაგვირგვინებთ ამ ციკლს. ევროინტეგრაციის პროცესი, რომელიც სრული დატვირთვით მიმდინარეობს, საქართველოს გარეშე არასრულია. დემოკრატიის ხელშეწყობის, განვითარების, მშვიდობის დამყარებისა და ლიბერალიზაციის კუთხით, ევროინტეგრაციის პროცესი უალტერნატივოა. ევროპული და ევროატლანტიკური ინტეგრაციის გზაზე საქართველომ უკვე მიიღო მნიშვნელოვანი ეკონომიკური, პოლიტიკური და უსაფრთხოებასთან დაკავშირებული სარგებელი. ქართველი ხალხი მომთმენია და რეალისტურად უყურებს იმას, რომ ამას დრო სჭირდება. დარწმუნებული ვარ, რომ საქართველოს მოსახლეობა მომავალშიც მხარს დაუჭერს ქვეყნის პროდასავლურ პოლიტიკურ ლიდერებს. ყველა ფაქტისა და ასპექტის გათვალისწინებით, ცხადია, რომ როგორც ჩვენი მიზნისკენ მიმავალ გზას, ისე თავად ამ მიზანს სარგებელი მოაქვს საქართველოსთვის”, – აღნიშნა პრემიერმა.