„მეტრონომის“ ექსკლუზიური ინტერვიუ „ნაცმოძრაობიდან“ წამოსულ გიორგი ვაშაძესთან
კორცხელში, საარჩევნო უბანთან მომხდარი დაპირისპირება კვლავაც აქტუალურია. შინაგან საქმეთა სამინისტროს ამ დრომდე არავინ დაუკავებია. “ნაციონალურმა მოძრაობამ” საპარლამენტო მუშაობა იმ დრომდე შეაჩერა, სანამ ინციდენტში მონაწილე ადამიანებს არ დააკავებენ. “მეტრონომი” კორცხელის საკითხზე, პოლიტიკურ გეგმებსა და შესაძლო პოლიტიკურ პარტნიორებზე “ნაციონალური მოძრაობის” ყოფილ წევრ გიორგი ვაშაძეს ესაუბრა.
“მეტრონომი”: კორცხელში მომხდარი ინციდენტით მინდა დავიწყოთ საუბარი. როგორ აფასებთ იქ განვითარებულ მოვლენებს, თქვენი აზრით რამდენად ეფექტურია შსს ამ საქმის გამოძიებისას?
გიორგი ვაშაძე: „ძალიან საგანგაშო ინციდენტია. უნდა გვესმოდეს, რომ დაპირისპირება და თავპირისმტვრევა ქვეყანას არნგრევს. სამწუხაროდ, საქმის კეთების ნაცვლად აქცენტები აქეთ გადადის. ვფიქრობ, ხელისუფლების რეაგირება ძალიან დაგვიანებული იყო. მოდი ისიც ვთქვათ, რომ მთავარი ამ ორგანიზატორების დასჯაა. ვინც ორგანიზება გაუკეთა ყველაფერს, ჩაიყვანა ეს სპორტსმენები ზუგდიდში
– კახა კალაძეს გულისხმობთ?
– იქნება ეს კალაძე, კვირიკაშვილი, ივანიშვილი თუ სხვა გამოძიებისგან სწორედ ეგ მაინტერესებს. უნდა დაისაჯოს ამ ყველაფრის ორგანიზატორი. ბუნებრივია, ეს ხალხი იქ შემთხვევით არ მოხვედრილა. ადამიანები რომელთაც კრიმინალი ჩაიდინეს უნდა დაისაჯონ და რაც შეიძლება სწრაფად.
8 ოქტომბერს არჩევნებია დაგეგმილი და ასეთი პროცესები არჩევნებისთვის ნორმალურ გარემოს ვერ უზრუნველყოფს. უნდა გვესმოდეს, რომ ხალხი დაიღალა დაპირისპირებით. საზოგადოებას უნდა ჩვეულებრივი ნორმალური ცხოვრება. ეს პოლიტიკოსებმა უნდა გავიაზროთ. მხოლოდ ნორმალურ პირობებშია შესაძლებელი ქვეყნის ეკონომიკა ფეხზე დააყენო, ასეთ პირობებს სამოქალაქო დაპირისპირებამდე მიჰყავს საზოგადოება. ამ ყველაფერში მთავარი პასუხისმგებლობა „ქართულ ოცნებას“ ეკისრება.
– „მრეწველების“ ლიდერ გოგი თოფაძეზეც მინდა გკითხოთ. ხურჩაში მომხდარი მკვლელობა თოფაძემ ასე შეაფასა: „ერთი კაცი მოკვდა, კი, ქართველია, ძალიან საწყენია, მაგრამ ამ დონეზე აყვანა არ მგონია დღეს საჭირო იყოს“ – რას იტყვით მის ამ განცხადებაზე?
– მინდა ოჯახს და საქართველოს კიდევ ერთხელ მივუსამძიმრო. ეს ძალიან საგანგაშო ფაქტია. თოფაძე ალბათ მოხუცდა და საერთოდ, სხვაგან არის. რას ნიშნავს ერთი კაცი მოკვდა? სახელმწიფოს, ხელისუფლების მოვალეობა არის ის, რომ თითოეული მისი მოქალაქე დაიცვას და თითოეული მისი მოქალაქის მკვლელობაზე რეაგირება მოახდინოს, თორემ ასე სათითად თუ დაგვხოცეს რაღა დავრჩებით?
ამიტომ ვფიქრობ, რომ აბსოლუტურად უპასუხიმგებლო განცხადებაა. მეორე მხრივ ჩვენ გვჭირდება მძლავრი უსაფრთხოების სისტემა, რომელიც არ დაუშვებს ასეთ ფაქტებს მომავალში. საჭიროა მკვეთრი საგარეო აქტიურობაც.
– იყო მთავრობა საერთაშორისო ასპარეზზე თანმიმდევრული ოთხოზორიას მკვლელობასთან დაკავშირებით?
– არა მგონია. რა რეაქცია ჰქონდა მთავრობას? თქვენ რამე რეალური ნაბიჯი მათი მხრიდან დაინახეთ?
– მთავრობის წარმომადგენლებმა განაცხადეს, რომ ფაქტს ჟენევის ფორმატაზე განიხილავენ…
– ასეთ შემთხვევაში, სასწრაფოდ უნდა იქნეს ნოტები გაგზავნილი ჩვენს მეგობარ ქვეყნებთან. ამ მთავრობის ძალიან სერიოზული პრობლემა სწრაფი რეაგირების არქონაა საერთაშორისო ასპარეზზე. დიპლომატები დაიბარა ვინმემ და აუხსნა იქ განვითარებული მოვლენები?
– თქვენს პოლიტიკურ ძალაზე მინდა გკითხოთ. მას „ახალი საქართველო“ ჰქვია. როდის გეგმავთ პარტიის პროგრამის პრეზენტაციას, ვინ იქნებიან თქვენი გუნდის ლიდერები?
– ჩვენს პოლიტიკურ პარტიაში ძალიან ბევრი ახალგაზრდაა ჩართული. ეს ძალიან მაგარია, რადგან ახალი სისხლი სჭირდება პოლიტიკას და ქვეყანას, თუმცა აქცენტი არა მარტო ახალგაზრდებზე გაკეთდება, არამედ ყველა თაობის ახალ ადამიანზე პოლიტიკაში.
რაც შეეხება უშუალოდ სამოქმედო გეგმას, 5 ივნისს რუსთაველზე, პარლამენტის წინ დამფუძნებელი ღონისძიება გვექნება, სადაც გავივლით ყველა იმ სამართლებრივ პროცედურას, რაც პარტიის დასარეგისტრირებად არის საჭირო. განსხვავებით სხვა პოლიტიკოსებისგან, ჯიბიდან პოლიტიკური პარტია არ ამომიღია და არ ვეუბნები ყველას, რომ ამ პარტიაში გაწევრიანდით.
– რა იქნება თქვენი პარტიის მთავარი გზავნილი?
– პირველი იქნება ეკონომიკური წინსვლა და უმუშევრობის დამარცხება და მეორე მნიშვნელოვანი საკითხი, რაზეც ყურადღებას გავამახვილებთ იქნება ის, რომ ქვეყანაში დაპირისპირება უნდა დასრულდეს.
ჩვენი მთავარი გზავნილი იქნება გამაერთიანებელი პოლიტიკური ძალის ჩამოყალიბება, რომელიც დაპირისპირებას დაამთავრებს.
– როდესაც პოლიტიკაში გამოჩნდით მედიაში აქტიურად წერდნენ, რომ თქვენი ნათესავი ჩხარტიშვილი დაგაფინანსებდათ. არჩევნებში ფინანსები მართლაც მნიშვნელოვანია. იქნება პარტიის მთავარი დამფინანსებელი ჩხარტიშვილი?
– რა თქმა უნდა, არჩევნებისთვის ფინანსები მნიშვნელოვანია. ჩვენ გვინდა ადამიანებმა თვითონ ჩადონ ინვესტიცია ქვეყნის განვითარებაში და ვამკვიდრებით Crowd Funding-ის პრინციპს. მაგალითად დღეს დილით ზესტაფონში ოფისი გავხსენით ერთი ჩვენი მხარდამჭერის საცხოვრებელ სახლში. ნაცვლად ფეშენებელური ოფისებისა, ჩვენ გავხსენით სახლში ამით განვსხვავდებით სხვა პარტიებისგან. არ ვაპირებთ დიდი ფული დახარჯვას არჩევნევნების მოსასყიდლად. პირიქით, კამპანია გვექნება არ გაყიდო შენი ხმა.
– თქვენი აზრით, ცალკეული ადამიანების თანადგომა საკმარისია?
– საქართველოს მოქალაქეები, რომლებიც საზღვარგარეთ ცხოვრობენ გვეხმიანებიან რათა მათაც გადმორიცხონ თანხა ამ საარჩევნო კამპანიითვის. ვფიქრობ ეს საკმარისი იქნება.
– ანუ ჩხარტიშვილის ფინანსები აღარ დაგჭირდებათ?
– ჩემი დამოკიდებულება ყველამ იცის ჩხარტიშვილის მიმართ, „ნაციონალურ მოძრაობაშიც“ იცოდნენ. როდესაც იუსტიციის მინისტრის მოადგილე ვიყავი ის წასული გახლდათ. მოკლედ ჩვენი პოლიტიკური ვექტორი ყოველთვის სხვადასხვა მხარეს იყო.
– შეძლებს თქვენი ახლადშექმნილი პარტია საარჩევნო ბარიერის გადალახვას?
– ამაში ასი პროცენტით დარწმუნებული ვარ. ბარიერს არა მხოლოდ გადავლახავთ, ძალიან სერიოზული შედეგიც გვექნება.
– თქვენ ცოტა ხნის წინ განაცხადეთ, რომ გიგა ბოკერიას დრო ქართულ პოლიტიკაში უნდა დასრულდეს. ბოკერია დიდი ხანია რაც “ნაციონალური მოძრაობის” ლიდერია, რომელიც პარტიის საგარეო ურთიერთობას კურირებს. ვხედავთ, რომ პარტია ისევ აქტიურად თანამშომლობს საერთაშორისო ორგანიზაციებთან თუ ქვეყნებთან და ეს ალბათ ბოკერის დიდი დამსახურებით ხდება. რატომ სვამთ ბოკერიას წასვლის საკითხს პოლიტიკიდან? შეგიძლიათ კონკრეტულად გვითხრათ მიზეზი?
– საგარეო ურთიერთობა არაფერ შუაშია. შიდასახელმწიფოებრივ და პარტიულ გადაწყვეტილებებში არიან ჩართულნი და ცდილობენ არ დაუშვან კონკურენცია. ამაში ვხედავ მთავარ პრობლემას.
– ანუ ბოკერიასთან ერთად დასახელებულ სხვა სახელებს მაჭავარიანი, გოგორიშვილი, გაბაშვილი, მათი პოლიტიკიდან წასვლის საკითხსაც სვამთ?
– ვამბობ, რომ ჩემი მიზანია ახალი ადამიანები გამოჩნდნენ პოლიტიკაში და ერთი და იგივე ხალხი არ ტრიალებდეს მასში მუდმივად.
-“ნაციონალური მოძრაობის” “რებრენდიგზე” – შეძლებენ ახალი სახეები პარტიის ახალ ლიდერებად ჩამოყალიბებას და ბოკერია, გოგორიშვილის, მაჭავარიანის და სხვები გავლენის შესუსტებას?
– ამას უკვე დრო გვიჩვენებს. ჯერჯერობით ვფიქრობ, რომ ეს ასე არ არის. მე ვერ დავინახე განახლების პერსპექტივა და სწორედ ამიტომ გადავდგი ის ნაბიჯი რაც გადავდგი.
– და ბოლოს… თქვენ გვერდით თუ მოიაზრებთ სხვა პოლიტიკურ ძალას?
– რატომაც არა. ჯერ დავაფუძნებთ პოლიტიკურ მოძრაობას და შემდგომ ძალიან ბევრი საინტერესო პროცესები იქნება. ყველა პროგრესულად მოაზროვნე პოლიტიკური ძალა უნდა გაერთიანდეს, რათა ქვეყანა წინ წავიდეს.
– თქვენთვის ვინ არიან პროგრესული ძალები?
– ამაზე მომავალში ვისაუბროთ.
მარიამ ვარადაშვილი