ჩინურმა სახელმწიფო კომპანიამ რუსეთს დარტყმითი დრონებისთვის 46 ტონა ნახშირბადის ბოჭკოს მასალა საიდუმლოდ გადასცა – გამოცემა POLITICO-ს მიერ მოპოვებული რუსული შიდა გადაზიდვების ჩანაწერების თანახმად, ჩინურმა სახელმწიფო კომპანიამ რუსეთს ასობით დარტყმითი დრონის დასამზადებლად საჭირო მასალები მიაწოდა. POLITICO-ს ცნობით, ტვირთი დეკლარირებული იყო საბაჟო კლასიფიკაციით, რომელიც ჩვეულებრივ გამოიყენება ისეთი მასალებისთვის, როგორიცაა ნაილონი და პოლიესტერი.
დოკუმენტები, რომლებიც დასავლურმა მთავრობებმაც შეისწავლეს, ყველაზე თვალსაჩინო მტკიცებულებაა იმისა, რომ ჩინეთის სახელმწიფოს მიერ კონტროლირებადი კომპანია განაგრძობდა რუსეთის სამხედრო-სამრეწველო კომპლექსთან დაკავშირებული სანქცირებული საწარმოს მომარაგებას. გადაზიდვისა და საბაჟო ჩანაწერები მოწმობს, რომ ამ წლის დასაწყისში ჩინურმა კომპანიამ რუსეთის სახელმწიფო ბირთვული კორპორაცია „როსატომის“ შვილობილ კომპანიას 46 ტონა ნახშირბადის ბოჭკოსთან დაკავშირებული ქიმიკატები გაუგზავნა.
„როსატომის“ შვილობილი კომპანია ამუშავებს კრიტიკულ კომპონენტებს დარტყმითი დრონებისთვის, რომლებსაც რუსეთი უკრაინის წინააღმდეგ თავდასხმებში იყენებს, მათ შორის ცენტრალურ უკრაინაში მდებარე სავაჭრო ცენტრზე აგვისტოს იერიშისას, რასაც სულ მცირე 16 ადამიანი ემსხვერპლა.
ჩინური წარმოების კომპონენტები უკრაინაზე თავდასხმების შემდეგ ჩამოგდებულ რუსულ დრონებში ადრეც აღმოუჩენიათ. თუმცა, გავრცელებული ინფორმაციით, ახლად მოპოვებული ჩანაწერები იძლევა პირველ დეტალურ მტკიცებულებას იმისა, რომ ჩინური სახელმწიფო კომპანია პირდაპირ ახორციელებდა რუსეთში დრონების წარმოებისთვის აუცილებელი მასალების ექსპორტს. ეს გადაზიდვები იმ ფონზე გამოვლინდა, როდესაც სულ უფრო იზრდება ყურადღება ჩინური კომპანიების მიმართ, რომლებსაც რუსეთის სამხედრო ძალისხმევის მხარდაჭერაში ადანაშაულებენ. ევროკავშირის დიპლომატიური სამსახური ოთხი ჩინური კომპანიის დასანქცირებას ითხოვდა უკრაინის წინააღმდეგ რუსეთის ომის სავარაუდო მხარდაჭერის გამო.
მოსალოდნელი იყო ამ კომპანიების შეყვანა ევროკავშირის სანქციების მორიგ პაკეტში. ოფიციალური პირების განცხადებით, მათ სავარაუდო საქმიანობაში შედიოდა რუსეთის ჩრდილოვანი ფლოტის მხარდაჭერა, რუსული არმიისთვის საჭირო ქიმიკატების მიწოდება და საბრძოლო დრონების წარმოებისთვის კომპონენტების უზრუნველყოფა.