“კონგრესის მიერ „MEGOBARI აქტის“ მიღება ნიშანია, რომ საერთაშორისო საზოგადოება საქართველოს ყურადღებით აკვირდება” – ევროკომისიის პრესსამსახური

აშშ-ის კონგრესის მიერ MEGOBARI აქტის მიღება აჩვენებს, რომ საერთაშორისო საზოგადოება ყურადღებით აკვირდება საქართველოში მიმდინარე მოვლენებს, – ამის შესახებ ევროკომისიის პრესსამსახურმა “ინტერპრესნიუსს” განუცხადა.

პრესსამსახურში აღნიშნავენ, რომ საქართველოს ხელისუფლების მიერ განხორციელებული ქმედებები საგანგაშოა და არ შეესაბამება იმას, რასაც ევროკავშირის სტრუქტურები კანდიდატი ქვეყნისგან ელოდებიან.

“აშშ-ის კონგრესის მიერ MEGOBARI აქტის მიღება აჩვენებს, რომ საერთაშორისო საზოგადოება ყურადღებით აკვირდება საქართველოში მიმდინარე მოვლენებს. საქართველოს ხელისუფლების მიერ განხორციელებული ქმედებები საგანგაშოა და შორს არის იმისგან, რასაც კანდიდატი ქვეყნისგან ველოდებით. ჩვენ მოვუწოდებთ საქართველოს ხელისუფლებას, გააუქმოს კანონმდებლობა, რომელიც შეუთავსებელია ევროკავშირის ღირებულებებთან. ევროკავშირმა რეაგირება მოახდინა საქართველოს ხელისუფლების მიმართ ზომების მიღებით და სამოქალაქო საზოგადოების მხარდაჭერის გაძლიერებით,”– უთხრეს ინტერპრესნიუსს ევროკომისიის პრესსამსახურში.