ჩოხატაურში, ხელვაჩაურსა და ლანჩხუთში, სახელმწიფომ ეკლესიას მიწის ნაკვეთები გადასცა. მთავრობის 17 და 18 ოქტომბრის განკარგულებების მიხედვით, მიწის ნაკვეთები ავტოკეფალურ მართლმადიდებელ ეკლესიას ერთ შემთხვევაში 99-წლიანი ვადით, დანარჩენ შემთხვევაში კი 1 ლარად გადაეცა. განკარგულებას ხელს ქვეყნის პრემიერი ირაკლი კობახიძე აწერს.
როგორც 18 ოქტომბრის მთავრობის განკარგულებაშია ნათქვამი, ავტოკეფალურ მართლმადიდებელ ეკლესიას ხელშეკრულების გაფორმებიდან 99 წლის ვადით, უსასყიდლოდ აღნაგობის უფლებით, გადაეცემა ქალაქ ლანჩხუთში, ჟორდანიას ქუჩაზე მდებარე 1619 კვ/მ არასასოფლო-სამეურნეო მიწის ნაკვეთი და მასზე განთავსებული შენობა/ნაგებობა.
17 ოქტომბრის განკარგულებით კი ეკლესიას 1 ლარად გადაეცა საკუთრებაში ჩოხატაურის სოფელ შუასურებში მდებარე 3610 კვ/მ და 160 კვ/მ მიწის ნაკვეთები. ასევე, 17 ოქტომბრის განკარგულებით, ხელვაჩაურის მუნიციპალიტეტის, სოფელ სალიბაურში მდებარე 300 კვ/მ მიწის ნაკვეთი, სამოციქულო ავტოკეფალურ მართლმადიდებლურ ეკლესიას 1 ლარად გადაეცა.