ქართულ “ფორბსთან” ინტერვიუში, ეროვნული ბანკის ყოფილი პრეზიდენტი განათლების სისტემაზე საუბრობს და აღნიშნავს, რომ სასკოლო სისტემაში რეიტინგების სისტემის დანერგვაა საჭირო. მისივე თქმით, კვლავ საქილიკო თემად რჩება ინგლისური ენა. ქადაგიძე აღნიშნავს, რომ საქართველო ინგლისურენოვანი ქვეყანა უნდა გახდეს.
“არ არსებობს არც ერთი განვითარებული ქვეყანა, ვისაც სასკოლო განათლებაში შესაბამისი რეიტინგები არ აქვს. ჩვენ ამ მიმართულებით სერიოზული პრობლემები გვაქვს. ჩვენი ახალგაზრდა თაობის ათიათასობით წარმომადგენელი, სკოლის დამთავრებისას საერთაშორისო მასშტაბით თავიანთ თანატოლებთან შედარებით, კონკურენტუნარიანი უკვე არ არის. ამის გამოსწორების გარეშე, ძალიან რთული იქნება განვითარება და ეს პირდაპირ კორელაციაშია ეკონომიკურ ზრდასთან.
ძალიან ხშირად ინგლისური საქილიკო თემაა, მაგრამ ჩვენ უნდა გავხდეთ ინგლისურენოვანი ქვეყანა. ჩვენ ინგლისური უნდა ვიცოდეთ ისე, როგორც საბჭოთა კავშირის დროს ვიცოდით რუსული. ამას ალტერნატივა არა აქვს.
რაც შეეხება უმაღლეს განათლებას, ამ მხრივაც მნიშვნელოვანია კარგი შედეგები, მაგრამ აქ თავის როლს მსოფლიო ტექნოლოგიური პროგრესი ასრულებს. ყველაზე განვითარებული და წარმატებული უმაღლესი სასწავლებლები თავიანთ საგანმანათლებლო კონტენტს დებენ ონლაინ და ის ყველასთვის ხელმისაწვდომია. დღეს აღარ არის საჭირო კონკრეტული ცოდნის მისაღებად ტოპ-სკოლაში სწავლა. თუ მოზარდებს ექნებათ შესაბამისი უნარები და ინგლისურის ცოდნა, მათ აქვთ შესაძლებლობა, კარგი განათლება მიიღონ”, – ამბობს ქადაგიძე.