რუსეთის თავდაცვის სამინისტრო ამტკიცებს, რომ მათ სარაკეტო დარტყმას უკრაინაში მებრძოლი ქართული ლეგიონის 60-მდე მებრძოლი ემსხვერპლა. ამის შესახებ რუსეთის თავდაცვის სამინისტროს სპიკერმა, გენერალ-ლეიტენანტმა იგორ კონაშენკოვმა ისაუბრა.
რუსეთის თავდაცვის სამინისტროს განცხადებით, 21 აპრილს ისკანდერის სარაკეტო სისტემით მათ იერიში მიიტანეს “უცხოელი დაქირავებულების” დროებით დისლოკაციის ადგილას შეიარაღების საცავზე, რომელიც დონეცკის ოლქში მდებარე ქალაქ კონსტანტინოვკაში მდებარეობდა. მათივე მტკიცებით, დაიღუპა ქართული ლეგიონის 60-მდე მებრძოლი, 20 კი მძიმედ დაიჭრა.
“რუსეთის თავდაცვის სამინისტროს აქვს ინფორმაცია ყველა უცხოელი დაქირავებული ჯარისკაცის შესახებ, რომელიც მონაწილეობს რუსი სამხედროების მკვლელობაში. ყველა მათგანს დამსახურებული ანგარიშსწორებით გავუსწორდებით”, – თქვა იგორ კონაშენკოვმა.
აღნიშნულ ინფორმაციას ქართული ლეგიონის ლიდერი, მამუკა მამულაშვილი გამოეხმაურა.
როგორც მამულაშვილმა “რადიო თავისუფლების” ჟურნალისტთან თქვა, ინფორმაცია ყალბია და მსგავსი რამ არ მომხდარა.
“მორიგი ყალბი ინფორმაციაა. როგორც ჩანს, ისინი საკუთარი სამხედროების მოტივირებას ცდილობენ და ჩვენ მათი პირველი სამიზნე ვართ. ისინი ცდილობენ, ჩვენი ერთ ჯგუფი მაინც გაანადგურონ,” – უთხრა მამულაშვილმა “რადიო თავისუფლებას”