გამოცემა “უკრაინსკაია პრავდა” ჟურნალისტის, მიხაილ ტკაჩის გამოძიებაზე დაყრდნობით, უკრაინული მედია ინფორმაციას ავრცელებს, რომ პარტია “ბატკივშჩინას“ ლიდერმა, იულია ტიმოშენკომ ახალი წლის დღეები დუბაიში გაატარა.
ტიმოშენკო ხელოვნურ კუნძულ პალმ-ჯუმეირაზე მდებარე ხუთვარსკვლავიანი სასტუმრო “კემპინსკის” ნომერში ქმართან ერთად ცხოვრობდა.
ვრცელდება ინფორმაცია, რომ ჯერ კიდევ ომის დაწყებამდე პოლიტიკოსი, ქალიშვილის ოჯახთან ერთად, დუბაიში გადავიდა საცხოვრებლად.
აღსანიშნავია, რომ ტიმოშენკო ძალიან ფრთხილობდა, რომ ის დუბაიში არ დაეფიქსირებინათ, თუმცა კამერებს მაინც ვერ დაემალა.
შეგახსენებთ, რომ საზღვარგარეთ დასასვენებლად ან სხვა არასახელმწიფო მიზნით გამგზავრებას თანამდებობის პირები ვეღარ შეძლებენ, – ამის შესახებ უკრაინის პრეზიდენტმა, ვოლოდიმირ ზელენსკიმ 24 იანვარს განაცხადა.
“არსებობს უკრაინის ეროვნული უსაფრთხოებისა და თავდაცვის საბჭოს პრინციპული გადაწყვეტილება თანამდებობის პირების საზღვარგარეთ მოგზაურობის შესახებ. ის შეეხება ცენტრალური ხელისუფლებისა და ადგილობრივი ხელისუფლების სხვადასხვა დონის ყველა თანამდებობის პირს. ეს ეხება სამართალდამცავებს, სახალხო დეპუტატებს, პროკურორებს და ყველას, ვინც უნდა მუშაობდეს სახელმწიფოსთვის და სახელმწიფოში. სურთ ახლა დასვენება – დაისვენებენ სახელმწიფო სამსახურის მიღმა. საზღვარგარეთ დასასვენებლად ან სხვა არასახელმწიფო მიზნით გამგზავრებას თანამდებობის პირები ვეღარ შეძლებენ“, – განაცხადა ზელენსკიმ.
