საქართველოს პრეზიდენტის, სალომე ზურაბიშვილის განცხადებით, ქვეყნის ყოფილ პრეზიდენტთან, მიხეილ სააკაშვილთან დაკავშირებით გავრცელებული ვიდეოკადრები მიუღებელია.
როგორც მან ორბელიანების სასახლეში გამართულ საგანგებო ბრიფინგზე აღნიშნა, სააკაშვილის ქცევის მიუხედავად დაცული უნდა იყოს მისი ღირსება.
“პირველ რიგში, დაცული უნდა იყოს ყოფილი პრეზიდენტის ღირსება მისივე ქცევის მიუხედავად. რამეთუ ყოფილი პრეზიდენტი მაინც დაკავშირებულია სახელმწიფოსთან და ამ სტატუსს უნდა ეცეს პატივი. ამდენად, იმ კადრების გავრცელება, რომლებიც ამ ღირსების და პატივის შემლახველია, ჩემთვის, როგორც ამ ქვეყნის პრეზიდენტისთვის, კატეგორიულად მიუღებელია”, – განაცხადა ზურაბიშვილმა.
შეგახსენებთ, რომ სპეციალურმა პენიტენციურმა სამსახურმა 11 ნოემბერს საქართველოს მესამე პრეზიდენტის, მიხეილ სააკაშვილის ვიდეოკადრები გაავრცელა, სადაც ჩანს, რომ პრეზიდენტი გლდანის ციხის საავადმყოფოში მისი ნების საწინააღმდეგოდ გადაიყვანეს.