ახალი ამბები მთავარი პოლიტიკა

გირჩმა მიშელის ახალ დოკუმენტს ხელი მოაწერა

გირჩის წევრებმა იაგო ხვიჩიამ, ვახტანგ მეგრელიშვილმა და ალექსანდრე რაქვიაშვილმა ევროპული საბჭოს პრეზიდენტის შარლ მიშელის მიერ მმართველი გუნდისა და ოპოზიციისთვის შეთავაზებულ ახალ დოკუმენტს ხელი მოაწერა.

“მოდი, ჩვენ რაღაცნაირი მაგალითი მივცეთ იმის, რომ ეს შესაძლებელია და ხელი მოვაწეროთ ამ დოკუმენტს, სად აწერენ-ხოლმე? ბოლოში თუ თავში? ნუ, ბოლოში. აი, მე მოვაწერე ამას ხელი, რომ შერიგდეს მიშა და ბიძინა. ეს არის დასაწყისი რაღაც შერიგების”, — განაცხადა ვახტანგ მეგრელიშვილმა.

ოპოზიციასა და ფასილიტატორ ელჩებს შორის, შეხვედრა გუშინ 18 მარტს შედგა. მხარეთა შორის შეხვედრას არ ესწრებოდა ქართული ოცნება.

ევროკავშირის ელჩმა კარლ ჰარცელმა  ევროკავშირის ოფისში, შეხვედრის დასრულების შემდეგ ბრიფინგზე განაცხადა, რომ ევროპული საბჭოს პრეზიდენტმა, შარლ მიშელმა მხარეებს ახალი დოკუმენტი წარუდგინა. იხილეთ დოკუმენტი სრულად აქ.

დოკუმენტის თანახმად, თუ ქართული ოცნება თვითმმართველობის არჩევნებში 43%-ზე ნაკლებს აიღებს, მმართველი გუნდი ვადამდელი არჩევნების დანიშვნის ვალდებულებას იღებს. დოკუმენტში საუბარია ნიკა მელიასა და გიორგი რურუას გათავისუფლებაზეც,

ქართულ ოცნებაში ამბობენ, რომ მათ უკვე მოაწერეს პირველ დოკუმენტს ხელი და მათი მხრიდან პირობების მეტი კორექტირება აღარ მოხდება და არ დაეთანხმებიან რაიმე შინაარსობრივ დამატებას. ამასთან, ოცნებაში ამბობენ, რომ თუ პრეზიდენტმა გიორგი რურუა შეიწყალა, კრიტიკულ პოზიციას არ დააფიქსირებენ. გარდა ამისა, ოცნებაში აცხადებენ, რომ განიხილავენ 40%-იანი ბარიერის გაზრდის შესაძლებლობასაც.

2020 წლის 31 ოქტომბრის არჩევნების ოფიციალური შედეგებით, მეათე მოწვევის პარლამენტში ოპოზიციურმა პარტიებმა 150 მანდატიდან 60 მოიპოვეს. სულ 8 ოპოზიციურმა პარტიამ და ბლოკმა: ნაციონალური მოძრაობა-ძალა ერთობაშია, სტრატეგია აღმაშენებელი, ევროპული საქართველო, ლელო, გირჩი, მოქალაქეები, პატრიოტთა ალიანსი, ლეიბორისტული პარტია. ოფიციალური შედეგების გამოცხადების შემდეგ, მათ არჩევნები გაყალბებულად გამოაცხადეს, პარლამენტში საქმიანობაზე უარი თქვეს და მოითხოვეს ცესკოს თავმჯდომარის შეცვლა, რიგგარეშე არჩევნების ჩატარება ახალი კანონმდებლობით და პოლიტპატიმრების გათავისუფლება.

პოლიტიკური კრიზისის მოგვარება ფასილიტატორმა ელჩებმა სცადეს და ხელისუფლება და ოპოზიცია მოლაპარაკების მაგიდასთან მიიწვიეს. მათი შუამავლობით ოპოზიციასა და ხელისუფლებას შორის მოლაპარაკებების ოთხი რაუნდი გაიმართა, თუმცა შეთანხმება ვერ შედგა.

კრიზისის განსამუხტად ევროპული საბჭოს პრეზიდენტი შარლ მიშელი საქართველოს 28 თებერვალს ეწვია. მისი ვიზიტის მიზანი 2020 წლის საპარლამენტო არჩევნების შემდეგ შექმნილი პოლიტიკური კრიზისი იყო, რაც ნაციონალური მოძრაობის თავმჯდომარის, ნიკა მელიას დაპატიმრებამ კიდევ უფრო გაამწვავა. შარლ მიშელმა ხელისუფლებასა და ოპოზიციას შორის ორმხრივი შეხვედრების დროს მოლაპარაკების გაგრძელების გარანტია მიიღო, რისთვისაც პირადი წარმომადგენელი კრისტიან დანიელსონი გამოგზავნა თბილისში.

ევროპული საბჭოს პრეზიდენტის, შარლ მიშელის პირადი წარმომადგენელი, კრისტიან დანიელსონი საქართველოში, ხელისუფლებასა და ოპოზიციას შორის მედიაციის მიზნით პირველად 12 მარტს ჩამოვიდა. მისი ვიზიტი 14 მარტს უნდა დამთავრებულიყო, თუმცა წარუმატებელი მოლაპარაკების გამო ვიზიტი გაახანგრძლივა. მისი შუამავლობით გამართული შეხვედრები მხარეებს შორის შეთანხმებით არ დასრულებულა. დანიელსონმა ქვეყანა 19 მარტს დატოვა.

კრისტიან დანიელსონი საქართველოში მხარეებს შორის მედიაციის გასაგრძელებლად 28 მარტს დაბრუნდა. თუმცა მისი მედიაციით გამართული მოლაპარაკებები კვლავ უშედეგოდ დასრულდა.

კრისტიან დანიელსონის მიერ წარდგენილ დოკუმენტში, რომელიც ხელისუფლებასა და ოპოზიციას მოლაპარაკების მაგიდაზე ედოთ 5 საკითხი იყო ნახსენები:

  • პოლიტიზებულ მართლმსაჯულებად აღქმულ საკითხებზე რეაგირება;
  • ამბიციური საარჩევნო რეფორმა;
  • კანონის უზენაესობა/სასამართლო რეფორმა;
  • პარლამენტში ძალაუფლების განაწილება;
  • მომავალი არჩევნები.

16 აპრილს, საქართველოს პარლამენტის თავმჯდომარემ არჩილ თალაკვაძემ მმართველი პარტიის, ქართული ოცნების ოფისში გამართულ ბრიფინგზე განაცხადა, რომ ქართული ოცნება ცალმხრივად ხელს აწერს ევროკავშირის მედიაციით შექმნილ დოკუმენტს. ამასთან, თალაკვაძის თქმით, ოცნება მზადაა, რომ თუ ადგილობრივ არჩევნებში 40%-ზე მეტს ვერ აიღებენ, ვადამდელ არჩევნებს დანიშნავენ.

ოპოზიციური პარტიები: გირჩი – მეტი თავისუფლება, სტრატეგია აღმაშენებელი, ნაციონალური მოძრაობა, ევროპული საქართველო, ლელო, ლეიბორისტული პარტია დოკუმენტზე ხელის მოწერას არ აპირებენ. ისინი შეთანხმებაზე ხელმოწერის მთავარ პირობად, მათი განცხადებით, პოლიტპატიმრების ნიკა მელიასა და გიორგი რურუას ციხიდან გამოსვლასა და რიგგარეშე არჩევნების დანიშვნას ასახელებენ.

ევროკავშირის მხრიდან შექმნილ პოლიტიკურ კრიზისთან დაკავშირებით ისმის გაფრთხილებები სხვადასხვა პოლიტიკური ნაბიჯების შესახებ, რაც შეთანხმების მიუღწევლობის შემთხვევაში გადაიდგმება, მათ შორისაა ფინანსური დახმარების შეჩერება საქართველოსათვის.

ავიაბილეთები იაფად
იტვირთბა....

სხვა ამბები

გუგავა: ლეიბორისტული პარტია, როგორც ერთადერთი დაუმორჩილებელი და უღალატო, დამოუკიდებლად მიიღებს ამ არჩევნებში მონაწილეობას

(ვიდეო) ნაციონალების დ**ას …. – მოქალაქე დეკანოიძესთან მივიდა და ენმ-ს აგინა

თბილისში მედიამენეჯერების, აქტივისტებისა და პოლიტიკოსების საწინააღმდეგო პლაკატები გამოჩნდა

ვაშაძე მელიასა და ხოშტარიაზე: წარმატებებს ვუსურვებ მათ, უბრალოდ, განსხვავებული გზა გვაქვს

დეგნანი – „ფაიზერის“ ნახევარი მილიონი დოზა არის საჩუქარი პრეზიდენტ ბაიდენისა და ამერიკის მთავრობისგან ქართველი ხალხისთვის, ნიშნად ჩვენი მეგობრობისა

გამოვლინდა ინფიცირების 2 617 ახალი შემთხვევა, გარდაიცვალა 9 პაციენტი