“ნაციონალური მოძრაობის” წევრის, ხატია დეკანოიძის განცხადებას, რომ სახელმწიფოს უსაფრთხოების სამსახურმა მის საარჩევნო შტაბში ჩამწერი მოწყობილობის დამონტაჟება სცადა, პარლამენტის თავმჯდომარე არჩილ თალაკვაძე ეხმაურება. როგორც თალაკვაძემ აღნიშნა, მოსმენა სწორედ ოპონენტების ნოუ ჰაუა:
“ყურადღების მისაპყრობად სჭირდება, რომ სახელმწიფო ინსტიტუტები დაადანაშაულოს, თითქოს, მას უსმენენ და დევნიან. ამ დროს დევნა და მოსმენა არის მისი პოლიტიკური პარტიის ნოუ ჰაუ, ხელწერა” – თქვა თალაკვაძემ.
ხატია დეკანოიძის თქმით, გვიან ღამით, მაშინ როცა მისი შტაბის წევრები საარჩევნო ღონისძიებას გეგმავდნენ, მის კაბინეტში სავარაუდოდ ფანჯრიდან შევიდნენ. მისივე თქმით, იმ დროისათვის შტაბში ელექტროენერგიაც გაითიშა. დეკანოიძე ვარაუდობს, რომ – განგებ. ხატია დეკანოიძე ამბობს, რომ სუს-ი წინასაარჩევნოდ ოპონენტების დაშინებასა და მათი მუშაობის შესახებ ინფორმაციის მიღებას ამ გზებით ცდილობს. როგორც მაჟორიტარობის კანდიდატმა აღნიშნა, საპატრულო პოლიცია მომხდარისთანავე გამოიძახეს, თუმცა შსს-ს წარმომადგენლებმა მათ უთხრეს, რომ მოსასმენი აპარატურის კვალი ვერც მათ და ვერც კინოლოგებმა აღმოაჩინეს.