კახეთში საოჯახო ტიპის დაწესებულებაში 22 წლის ბენეფიციარი გარდაიცვალა. შემთხვევა სიღნაღის მუნიციპალიტეტის, სოფელ ქედელში მოხდა.
ადგილობრივების ინფორმაციით, გარდაცვლილი შშმ პირი იყო.
„ლ.ლ ქედელში, საოჯახო ტიპის დაწესებულებაში ცხოვრობდა, ჯანმრთელი იყო, არც კი ცივდებოდა და ასეთი ჯანმრთელი კაცი მწვადმა დაახრჩო. ის 22 წლის იყო. რამდენიმე დღის წინ დაკრძალეს.
შშმ პირი იყო და საოჯახო ტიპის დაწესებულებაში ამიტომ ცხოვრობდა. კარგი ადამიანი იყო, გულკეთილი და ხალისიანი”, – ამბობს ადგილობრივი.
„პრაიმტაიმი“ ქედელის თემის დირექტორს დაუკავშირდა. ის ამბობს, რომ ლ.ლ ნამდვილად მწვადის ნაჭრის გადაცდენით დაიღუპა.
„ბენეფიციარი დაახლოებით ერთი კვირის წინ გარდაიცვალა და ოჯახმა დაკრძალა. მას ფიზიკური ჯანმრთელობის პრობლემა არ ჰქონია, გონებრივი ჩამორჩენა ჰქონდა.
ძიება დაწყებულია, ჯერჯერობით ექსპერტიზის შედეგებს ველოდებით”, – ამბობს გელა ღლიღვაშვილი.