ილიაუნის აკადემიური საბჭო საპატრიარქოს პასუხობს

ილია II: “საქართველოში მსგავსი შეურაცხყოფა არ მომხდარა”

აკადემიური საბჭოს განცხადებას „მეტრონომი“ უცვლელად გთავაზობთ:

„2015 წლის 2 ნოემბერს გავრცელდა საქართველოს საპატრიარქოს განცხადება, რომელიც ეხება ილიას სახელმწიფო უნივერსიტეტში 24 ოქტომბერს ჩატარებულ კონფერენციასა და მის ვიზუალურ მასალას.

აღნიშნულ განცხადებასთან დაკავშირებით, ილიას სახელმწიფო უნივერსიტეტის აკადემიური საბჭო აცხადებს:  ილიას სახელმწიფო უნივერსიტეტი, საქართველოს კონსტიტუციის, საქართველოს შესაბამისი კანონმდებლობისა და უნივერსიტეტის წესდების თანახმად, ვალდებულია უზრუნველყოს პროფესორის აკადემიური თავისუფლება, რაც გულისხმობს  მეცნიერული ინტერესის მქონე  ნებისმიერ თემაზე მსჯელობის შესაძლებლობას;

ილიას სახელმწიფო უნივერსიტეტის აკადემიურ საზოგადოებას  არასოდეს ჰქონია ვინმეს შეურაცხყოფისა და სამოქალაქო სიმშვიდის დარღვევის განზრახვა;

ილიას სახელმწიფო უნივერსიტეტი ყოველთვის დაიცავს თავისი პროფესორებისა და სტუდენტების გამოხატვის თავისუფლებას ნებისმიერი ინსტიტუტის ცენზურისგან;

ადამიანებს, რომლებიც მიიჩნევენ, რომ მათი უფლებები დაირღვა ილიას სახელმწიფო უნივერსიტეტში ჩატარებული კონფერენციით, აქვთ შესაძლებლობა, მიმართონ შესაბამის სამართლებრივ გზებს“. – ნათქვამია ილიაუნის აკადემიური საბჭოს განცხადებაში.

შეგახსენებთ, რომ საქმე მხატვარ ლია უკლებას ტილოს ეხება, სახელწოდებით „ღვთისმშობელი სათამაშო პისტოლეტით“. ნახატი 24 ოქტომბერს, ილიას სახელმწიფო უნივერსიტეტში ჩატარებული კონფერენციის ფარგლებში გამოიფინა და საპატრიარქოს და მართლმადიდებელი მორწმუნეების ნაწილის დიდი გულისწყრომა გამოიწვია. აჟიოტაჟს საქართველოს პატრიარქი ილია მეორე გამოეხმაურა და აღნიშნა, რომ “საქართველოში მსგავსი შეურაცხყოფა არ მომხდარა”.