დაღუპული თამარ ბაჩალიაშვილის საქმესთან დაკავშირებით, ცოტა ხნის წინ “მთავარი არხის” ეთერში, არხის გენერალურმა დირექტორმა ნიკა გვარამიამ გაასაჯაროვა “წერილი მომავლიდან”, რომელიც თამარ ბაჩალიაშვილის დამსაქმებელი კომპანია ZAG-ის ტექნიკურ მენეჯერ ნიკა გეჯაძეს გაუგზავნეს.
არსებობდა ეჭვი, რომ წერილი შესაძლოა თამარ ბაჩალიაშილს დაეწერა, თუმცა მასში მოყვანილი ფაქტობრივი უზუსტობების გამო ნიკოლოზ გეჯაძე ვარაუდობს, რომ ის თამარის დაწერილი არ არის.
თუმცა, წყაროს რწმუნებით: “დადგენილია, რომ წერილის ავტორი თამარ ბაჩალიაშვილია. ადრესატის სახელზე არსებობს სხვა წერილებიც, რომლებიც დათარიღებულია 2030, 2040 და ა.შ. წლებით და რომელთაც ნიკა გეჯაძე მომავალში მიიღებს.”
ZAG-ის მენეჯერი ნიკოლოზ გეჯაძე ამ ეტაპისთვის ჟურნალისტებთან საუბარზე უარს აცხადებს.
საქმესთან დაკავშირებით, განცხადება კომპანია “ZAG-ის” ადვოკატმა, ქეთი მირიანაშვილმა გააკეთა.
“ჩვენ მივაწოდეთ გამოძიებას ის წერილი. ვერ გეტყვით, საიდანაა გამოგზავნილი და ვისია. თამუნას გამოგზავნილი რომც იყოს, ფაქტია, ამ წერილის მიღების შემდეგაც თამუნა სამსახურში ჩვეულებრივად იქცეოდა.
წერილის ავტორი რომ თამუნა არ იყო, იმან მაფიქრებინა, რომ მასში უზუსტობები იყოო, ეს გეჯაძის სიტყვებია. ამიტომაც, არ უფიქრია ნიკას გადაჭრით, რომ წერილი თამუნას გამოგზავნილი იყო. მასში ევროპაში ყოფნის ერთი წელია ნახსენები, არადა, თუ არ ვცდები, თამუნა 3-4 თვეს იმყოფებოდა საფრანგეთში. იქ მოყვანილი ნიუანსები მათ ურთიერთობას არ ასახავს. წერილში იმდენად აბსურდული სიტუაციებია მოყვანილი, გრჩება შთაბეჭდილება, რომ ავტორი ისეთ ადამიანს სწერს, რომელთანაც გამხელილი აქვს თავისი გრძნობა, თითქოს მათ შორის რაღაც ურთიერთობა უნდა არსებობდეს და ამის შედეგად პრეტენზიები უნდა ჰქონოდა. მქონდა ეჭვი, ნიკას ვინმე სხვამ ხომ არ მისწერა – აქეთ დეა იყო, იქით ბაჩანა ლობჟანიძე გამოჩნდა და ვიფიქრე, მას ხომ არ ეგონა, რომ თამარს ნიკასთან ჰქონდა ურთიერთობა და მან მისწერა-მეთქი. წერილი თამუნას დაწერილი არა მგონია, აბსურდია. სამსახურის იქით მას და ნიკას არაფერი აკავშირებდათ, ამიტომაც გაჩნდა ეჭვი წერილის წარმომავლობაზე”, – აცხადებს მირიანაშვილი.
შეგახსენებთ, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი შაბათს სახლიდან გავიდა, ის სათვალთვალო კამერებმა ბოლოს თეთრიწყაროს რაიონში დააფიქსირეს. მოგვიანებით 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს.