პროკურატურამ ვაჟა-ფსაველაზე მომხდარი მკვლელობის ფაქტზე, სადაც ბრმად გასროლილ ტვიას ქალი ემსხვერლა, პოლიციის თანამშრომელი დააკავა.
ამის შესახებ საქართველოს გენერალური პროკურატორის მიერ გავრცელებულ განცხადებაში წერია.
როგორც განცხადებაში ნათქვამია, ნასვამ მდგომარეობაში მყოფმა პოლიციის თანამშრომელმა საცხოვრებელი სახლიდან უმისამართოდ გაისროლა და ქალს თავის არეში მოხვდა, რის შედეგადაც გარდაიცვალა.
“თბილისის პროკურატურის საგამოძიებო ნაწილის თანამშრომლებმა, საქართველოს შინაგან საქმეთა სამინისტროსთან ერთად ჩატარებული საგამოძიებო მოქმედებების შედეგად, თ.ა.-ს გაუფრთხილებლობით სიცოცხლის მოსპობის ფაქტზე ბრალდებულის სახით საქართველოს შინაგან საქმეთა სამინისტროს თანამშრომელი ს.გ დააკავეს.
საქმეზე ჩატარებული გამოძიებით დგინდება, რომ ნასვამ მდგომარეობაში მყოფმა ს.გ.-მ საკუთარი საცხოვრებელი ბინის აივნიდან განახორციელა ცეცხლსასროლი იარაღიდან უმისამართო გასროლა. გასროლილი ტყვია თავის არეში მოხვდა მიმდებარე კორპუსში მცხოვრებ თ.ა.-ს, რის შედეგადაც ეს უკანასკნელი გარდაიცვალა.
იმის გათვალისწინებით, რომ შესაძლოა დანაშაული ჩადენილი ყოფილიყო შინაგან საქმეთა სამინისტროს თანამშრომლის მიერ, გამოძიების საწყის ეტაპზევე სისხლის სამართლის საქმე გამოსაძიებლად გადმოეცა თბილისის პროკურატურის საგამოძიებო ნაწილს. საქმეზე განხორციელდა შემთხვევის ადგილის დათვალიერება. ჩატარდა ბრალდებულის საცხოვრებელი ბინის ჩხრეკა
ბრალდებულის საცხოვრებელი ბინის ჩხრეკისას ამოღებული იქნა გასროლილი ტყვიის მასრები და ცეცხლსასროლი იარაღი.
ექსპერტების მიერ განხორციელდა ნიმუშების აღება. მოწმის სახით გამოიკითხა არაერთი პირი. საქმეზე აქტიურად გრძელდება გამოძიება და ტარდება ყველა საჭირო საგამოძიებო და საპროცესო მოქმედება“, – აღნიშნულია საქართველოს გენერალური პროკურატურის განცხადებაში.
ცნობისთვის, შემთხვევა გუშინ ღამით მოხდა. გავრცელდა ინფორმაცია, რომ თბილისში ბრმად გასროლილმა ტყვიამ ქალი საკუთარ სახლში იმსხვერპლა. გარდაცვლილი ქალი მომღერალ თიკა მახალდიანის დედაა. ის ადგილზე გარდაიცვალა.