“რაც ჭიდაობის ჩემპიონატზე ვიხილეთ ამაზრზენია” – კახა კალაძე

ჭიდაობის ჩემპიონატზე მომხდარი ჩხუბის ფაქტი კახა კალაძისთვის კატეგორიულად მიუღებელია.

კალაძის განცხადებით, რაც თბილისის სპორტის სასახლეში, საქართველოს ჩემპიონატის მიმდინარეობისას მოხდა, საღად მოაზროვნე ადამიანისთვის არ უნდა იყოს მისაღები.

„ჩემთვის კატეგორიულად მიუღებელია. ვფიქრობ, ყველა ნორმალური ადამიანისთვის, ვინც საღად მოაზროვნეა, ეს მისაღები და დადებითი ვერ იქნება. რაც მოხდა, მართლაც ამაზრზენი იყო, ეს ყველამ ერთად ვიხილეთ სატელევიზიო ეთერში“ – განაცხადა კახა კალაძემ.

თბილისის მერი მიიჩნევს, რომ გამოძიების დასრულების შემდეგ, დანაშაულის ჩამდენი პირის პასუხისმგებლობის საკითხი უნდა დადგეს.

„როგორც ვიცი, გამოძიებაც დაწყებულია ამ მიმართულებით და რა თქმა უნდა, დანაშაულის ჩამდენი პირის პასუხისმგებლობის საკითხი უნდა დადგეს“, – განაცხადა კახა კალაძემ.

შეგახსენებთ, რომ 2019 წლის 11 იანვარს, ზურაბ დათუნაშვილსა და რობერტ კობლიაშვილს შორის გამართული ფინალური შეხვედრისას მსაჯის მიერ მიღებულ გადაწყვეტილებას მასობრივი ჩხუბი მოჰყვა.  დაპირისპირებაში ჩართულნი იყვნენ როგორც თავად სპორტსმენები, აგრეთვე საქართველოს ჭიდაობის ფედერაციის წარმომადგენლები.