“ნაციონალური მოძრაობის” ერთ-ერთმა ლიდერმა, გრიგოლ ვაშაძემ თელავის პოლიციის მთავარ სამმართველოსთან, სადაც დავით კირკიტაძის დაკავებასთან დაკავშირებით აქცია გაიმართა განაცხადა, რომ აღშფოთებულია და ასეთ სახელმწიფოში ცხოვრება აღარ უნდა.
ვაშაძე გურჯაანის სოფელ ველისციხესთან მომხდარზე პასუხისმგებლობას შს სამინისტროს აკისრებს. ის კირკიტაძის დაუყოვნებლივ გათავისუფლებას ითხოვს
„დავით კირკიტაძეს პოლიციის მანქანა არ დაუზიანებია, მან დააზიანა გაუგებარი წარმოშობისა და კუთვნილების ავტობუსი, რომელიც პოლიტიკურმა პოლიციამ გზაზე იმისთვის დააყენა, რომ ჩვენთვის კონსტიტუციური უფლება შეეზღუდა.
დათო კირკიტაძე თქვენი მხარდამჭერი არ არის, ამიტომ თუ შიმშილობა გამოაცხადა, იშიმშილებს ბოლომდე. კანონისა და მორალის ფარგლებში გეუბნებით, ეს ადამიანი გაათავისუფლეთ. გინდათ გირაო შეუფარდეთ, თუ გინდათ სხვა რამე მოიფიქრეთ. გაანებეთ ჩვენს მხარდამჭერებს თავი, გამოუშვით ეს ადამიანი და რამდენჯერაც საჭირო იქნება, იმდენჯერ მივა სასამართლოში“, – განაცხადა ვაშაძემ.
დავით კირკიტაძის თანაგუნდელებმა კახეთის მთავარ სამმართველოსთან მცირერიცხოვანი აქცია გამართეს და წინასწარი დაკავების იზოლატორში მყოფ კირკიტაძეს მხარდაჭერა გამოუცხადეს.
შეგახსენებთ, რომ „ერთიანი ნაციონალური მოძრაობის“ წევრი დავით კირკიტაძე სამართალდამცველებმა 17 დეკემბერს დააკავეს. გამოძიება საქართველოს სისხლის სამართლის კოდექსის 353-ე პრიმა მუხლით მიმდინარეობს.