საქართველოს მთავარმა პროკურატურამ ხორავას ქუჩაზე, მოზარდების მკვლელობის ადგილზე გადაღებულ ფოტო-მასალა გაავრცელა, რომელიც საქმეში მტკიცებულების სახით არის წარმოდგენილი.
უწყებაში საგანგებო ბრიფინგი რამდენიმე წუთის წინ გაიმართა. როგორც შოთაძის უწყებაში აცხადებენ, პროკურატურა საზოგადოების მაღალი ინტერესიდან გამომდინარე თავს ვალდებულად თვლიან, იმ საკითხებზე, რომელიც აქტუალურია განმარტებები გააკეთონ.
პროკურატურაში გამართულ ბრიფინგზე განაცხადეს, რომ მოზარდების მკვლელობის ადგილიდან ამოღებულ ნივთმტკიცებათა შორის არის ერთი სამედიცინო მაკრატელი, რომელიც უწყების მტკიცებით, ადგილზე მისულ სამედიცინო პერსონალს ეკუთვნოდა.
„ამოღებული იქნა შემთხვევის ადგილზე სამედიცინო მაკრატელი. ჩატარებული საგამოძიებო მოქმედებით დადგინდა, რომ ეს მაკრატელი ეკუთვნის შემთხვევის ადგილზე მისულ სასწრაფო-სამედიცინო დახმარების ბრიგადას, რომელთაც დარჩათ ეს ნივთი შემთხვევის ადგილზე, შესაბამის დახმარების გაწევის შემდგომ. აღნიშნული გარემოება დადასტურდა ექიმების ჩვენებით, რომელთა ეჭვქვეშ დაყენების არანაირი საფუძველი არ არსებობს.
ხაზგასმით უნდა აღვნიშნოთ, რომ ჩატარებული ყველა საგამოძიებო მოქმედებით, მათ შორის მოწმეთა დაკითხვით, სხვა მაკრატლის ან საგნის არსებობა არ დგინდება,“-განაცხადეს პროკურატურაში გამართულ ბრიფინგზე.
უწყების ინფორმაციით, შემთხვევის ადგილზე ამოღებულია ორივე გარდაცვლილის სისხლის ნიმუშები, რომელთა ადგილმდებარეობამ და ლოკაციამ გამოძიებას საშუალება მისცა დაედგინა ჩადენილი მკვლელობის კონკრეტული ადგილები.
შეგახსენებთ, ხორავას ქუჩაზე მოზარდების მკვლელობის საქმის ექსპერტი მაია ნიკოლეიშვილი აცხადებს, რომ ერთ-ერთი მოკლული მოზარდის ჭრილობები სავარაუდოდ, მაკრატლითაა მიყენებული და არა დანით, რომელსაც პროკურატურა ამტკიცებს. ჩანაწერი სასამართლო პროცესიდან ტელეკომპანია “რუსთავი 2”-მა მოიპოვა.
„დავით სარალიძის ქურთუკის წინა მარჯვენა ჯიბესთან არსებული ორი დაზიანება კუთხოვანი და ხაზოვანი ფორმისაა, ორმაგი. არ წარმოადგენენ ნაკვეთ, ნაჩხვლეტ დაზიანებებს და მიყენებული უნდა იყოს ერთი და იმავე საგნით, რომელსაც აქვს თავისებურებები. არ გამორიცხავს მათ მიყენებას გაშლილი, ისევ მაკრატელზე წავედით, ანუ დანები გამორიცხულია,“ – განაცხადა მაია ნიკოლეიშვილმა.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა. განზრახ მკვლელობის მუხლით დაკავებულია 2 არასრულწლოვანი, ხოლო დანაშაულის დაფარვის მიზნით პასუხისგებაში 5 პირია მიცემული. საქმეზე სასამართლო პროცესები მიმდინარეობს.