ოკუპირებული ცხინვალის საავადმყოფოს თანამშრომელი გაზეთ “კვირის პალიტრასთან” ექსკლუზიურ ინტერვიუში ყვება, რომ როდესაც არჩილ ტატუნაშვილი ცხინვალის საავადმყოფოში შეიყვანეს, უკვე მკვდარი იყო.
ოკუპირებულ ცხინვალსა და რუსეთში ჩატარებული სასამართლო-სამედიცინო ექსპერტიზის დასკვნით, არჩილ ტატუნაშვილი გულის მწვავე უკმარისობით დაიღუპა, თუმცა საავადმყოფოს თანამშრომელი დეტალებზე საუბრობს:
“მაღალჩინოსნებს რაც უნდათ, იმას აწერინებენ საავადმყოფოს ხელმძღვანელობას და როცა უნდათ, მაშინ შემოიყვანენ ცოცხალსა თუ მკვდარს. ტატუნაშვილის საქმე იყო ყველაზე გახმაურებული, თუმცა, იმავდროულად, ყველა დუმდა. ცხინვალის საავადმყოფოში რომ მოიყვანეს, უკვე მკვდარი იყო, თუმცა ცხედარი მაინც რეანიმაციაში შეიტანეს და რამდენიმე დღე დატოვეს. შემდეგ კი გვამი გაქრა. ძველ კორპუსებში არის საიდუმლო განყოფილება და სავარაუდოდ, იქ ჰყავდათ, თუმცა ზუსტად არ ვიცი. ასეთ საქმეებში ჩაძიების უფლება არა გვაქვს”
მისი თქმით, ტატუნაშვილის ე.წ. სამედიცინო ისტორია ერთ-ერთი მაღალჩინოსნის კარნახით შეადგინეს, შემდეგ კი რეგისტრაციიდან გააქრეს.
“როდესაც ქართულმა მხარემ საერთაშორისო ორგანიზაციებს მიმართა, ხმაური ატყდა და ეს საქმე ლამის მთელი მსოფლიოს განსჯის საგანი გახდა, ისევ დააბრუნეს რეგისტრაციის განყოფილებაში. მოგვიანებით კი ცხინვალის ე.წ. პარლამენტის სპიკერ გასიევის მითითებით ტატუნაშვილის სამედიცინო ისტორია სეიფში შეინახეს.
როდესაც ტატუნაშვილი საავადმყოფოში შემოიყვანეს, უკვე გვამური ლაქები, სისხლნაჟღენთები და შეშუპება აღენიშნებოდა. ეს, რაც ერთი შეხედვით შევამჩნიე, თორემ მასთან მიკარების უფლება მხოლოდ ნდობით აღჭურვილ ექიმებს ჰქონდათ. არაადამიანურად ნაწამები რომ იყო, ეს ინფორმაცია მაინც გავრცელდა”- ყვება “კვირის პალიტრასთან” ოკუპირებული ცხინვალის საავადმყოფოს თანამშრომელი.
წყარო: კვირის პალიტრა