საქართველოში შვეიცარიის საელჩო არ ფლობს ინფორმაციას, დატოვა თუ არა საქართველო რუსეთის ფედერაციის ინტერესების სექციის თანამშრომელმა, რომლის გაძევების გადაწყვეტილებაც საგარეო უწყებამ მიიღო. ამის შესახებ პირველ არხს საქართველოში შვეიცარიის საელჩოში განუცხადეს.
რუს დიპლომატს ქვეყნის დასატოვებლად საქართველოს მთავრობამ შვიდდღიანი ვადა მისცა, რომელიც ხუთშაბათს გადის. დიპლომატის გაძევების შესახებ საქართველოს საგარეო საქმეთა სამინისტრომ 29 მარტს განაცხადა.
საქართველოს საგარეო უწყების განცხადების თანახმად, გადაწყვეტილება გაერთიანებული სამეფოს ტერიტორიაზე სერგეი სკრიპალის მოწამვლის ფაქტს უკავშირდება.
რუსეთის საგარეო საქმეთა სამინისტროს ვებგვერდზე გამოქვეყნებული ინფორმაციის თანახმად, შვეიცარიის საელჩოში რუსეთის ფედერაციის ინტერესების სექციაში 10 დიპლომატი მუშაობს.