თიანეთის მერი, თამაზ მეჭიაური მერიაში ახალ დაპირისპირებას აანონსებს. მისი თქმით, დეპუტატ ზაქარია ქუცნაშვილის დავალებით, გარკვეული ჯგუფები მისი იმპიჩმენტის დაყენებას გეგმავენ. მერი ამბობს, რომ ეს კულუარული ინფომაცია რამდენიმე დღის წინ მიიღო, თუმცა აქვე აღნიშნავს, რომ მასთან დაპირისპირებულ ძალებს იმპიჩმენტისთვის რაიმე ბერკეტი, მოცემულ პერიოდში, არა აქვთ.
„ჩემი მერად არჩევიდან 6 თვის შემდეგ, თეორიულად, შეუძლიათ, ჩემი იმპიჩმენტი მოითხოვონ, ეს სავარაუდოდ, საკრებულოს მეშვეობით განხორციელდება. სამწუხაროდ, იმპიჩმენტის შესაძლებლობას მოქმედი კანონმდებლობა იძლევა, სადაც კარგად არ არის განმარტებული, რა შემთხვევაში შეიძლება იმპიჩმენტი დადგეს,“ – განაცხადა თამაზ მეჭიაურმა.