განათლების მინისტრი ალექსანდრე ჯეჯელავა საატესტატო გამოცდების შედეგებს გამოეხმაურა, რომლის თანახმადაც 11 ათასმა სკოლის მოსწვალემ გამოცდები ვერ ჩააბარა. მისი თქმით, აღნიშნული შედეგები წინა წლის შედეგებისგან არ განსხვავდება.
“შედეგები წინა წლის შედეგებისგან არ განსხვავდება, ესენი არიან ბავშვები, რომლებმაც არ გამოიჩინეს დიდი მოტივაცია სწავლის, მოგეხსენებათ, რომ გერმანიაში სრულ 12-კლასიან ატესტატს მოსწავლეების 30% იღებს, ჩვენთან კი 80%-ზე მეტი. მოვუწოდებთ ყველას, რომ ხელობაზე გააკეთონ აქცენტი, დაწყებული კომპიუტერული მეცნიერებებიდან, დამთავრებული ბევრი სხვა მიმართულებით. ეს ძალიან კარგი შანსია მათთვის, რომ უმოკლესი გზით მოხვდნენ შრომით ბაზარზე და ღირსეული პროფესიული ცხოვრება ჰქონდეთ”, – განაცხადა ჯეჯელავამ.
ჟურნალისტების კითხვაზე, უკავშირებდა თუ არა ის ამ ყველაფერს თუნდაც იმას, რომ მოსწავლეებს რეპეტიტორებთან მისვლის საშუალება არ აქვთ, ჯეჯელავამ უპასუხა, რომ საატესტატო გამოცდების საკითხები ელემენტარული იყო და მოსწავლემ ცოტა მაინც თუ ისწავლა, აუცილებლად ჩააბარებდა.
“როგორც კი იმ ადამიანს, ვისაც შესაბამისი მოტივაცია არ აქვს, ოჯახი შეეცდება, რომ აუცილებლად უმაღლესში უკრას თავი, რა თქმა უნდა, რეპეტიტორიც დასჭირდება და ათასობით ლარის დახარჯვაც, ამ ხალხმა უნდა მოინდომოს. ალბათ ნანახი გაქვთ საგამოცდო საკითხები – უელემენტარულესია. ცოტა მაინც თუ ისწავლა, ყველა აბარებს”, – განაცხადა ჯეჯელავამ.