ზუგდიდში, გურამიშვილის ქუჩაზე, რკინიგზის სადგურთან ახალგაზრდა ქალის ცხედარი იპოვეს. ამის შესახებ სამართალდამცველებს თვითმხილველებმა შეატყობინეს, რომელთა განცხადებით, გარდაცვლილი ახალგაზრდა ქალია და მას რაიმე სახის ფიზიკური დაზიანებები არ ეტყობა.
ადგილზე ექსპერტ-კრიმინალისტები მუშაობენ. გარდაცვლილი ქალის ცხედარი ექსპერტიზაზეა გადასვენებული.
როგორც „მეტრონომს“ შინაგან საქმეთა სამინისტროს პრესსამსახურში განუცხადეს, საქმეზე გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
უწყების ინფორმაციით, პირველადი დათვალიერებით, ცხედარს სხეულზე ძალადობის კვალი არ აღენიშნება. გარდაცვლილის ვინაობის დადგენა მიმდინარეობს და უწყება სხვა დანარჩენ ინფორმაციას მოგვიანებით გაავრცელებს.