ათათურქის საერთაშორისო აეროპორტმა სტამბულში მუშაობა უკვე განაახლა.
პრემიერ-მინისტრ ბინალი ილდირიმის განცხადებით, აეროპორტმა ავიარეისების მიღება და გაშვება უკვე დაიწყო.
”საგამოძიებო მოქმედებები ისევ გრძელდება, თუმცა აეროპორტი გახსნილია და საჰაერო მიმოსვლა აღდგა”, – აღნიშნა ილდირიმმა.
შეგახსენებთ, რომ ბოლო მონაცემებით, ათათურქის სახელობის აეროპორტში მომხდარ ტერაქტებს სულ მცირე 50-მდე ადამიანი ემსხვერპლა. დაშავებულია 150 ადამიანი, აქედან ექვსის მდგომარეობა მძიმეა. პასუხისმგებლობა მომხდარისთვის ჯერჯერობით არცერთ დაჯგუფებას არ აუღია, თუმცა, პრემიერ-მინისტრის განცხადებით, სამხილები “ისლამურ სახელმწიფოზე” მიუთითებს.
რაც შეეხება ათათურქის აეროპორტიდან თბილისში დღეს დაგეგმილ რეისებს, ის განრიგის მიხედვით შესრულდება.
დღის განმავლობაში დაგეგმილია ორი რეისი, რომელსაც Turkish Airlines-ი განახორციელებს. ბოინგი სტამბულის ათათურქის აეროპორტიდან თბილისის მიმართულებით რეისებს 18:10 საათსა და 21:15 საათზე შეასრულებს.
ათათურქის აეროპორტში მომხდარი აფეთქებების გამო თბილისის საერთაშორისო აეროპორტში თურქეთის მიმართულებით წუხელ დაგეგმილი ყველა რეისი გაუქმდა.