aviabiletebi
ახალი ამბები ინტერვიუ მთავარი პოლიტიკა

პარტნიორების ძებნაში: რამდენად მისაღებია ბურჭულაძის პარტია „ნაცმოძრაობისათვის“

aviabiletebi
ავიაბილეთები

„მეტრონომის“ ექსკლუზიური ინტერვიუ „ნაცმოძრაობის“ ლიდერ გივი თარგამაძესთან

საკრებულოს შუალედური არჩევნები საკმაოდ რეზონანსული გამოდგა. ოთხიდან ორ რეგიონში ყოფილმა მმართველმა ძალამ „ნაციონალურმა მოძრაობამ“ გაიმარჯვა. ერთ-ერთ საარჩევნო უბანზე მომხდარი დაპირისპირება კვლავაც აქტუალურია. სწორედ ამ ინციდენტზე, წინასაარჩევნო მოლოდინზე „მეტრონომს“ „ნაციონალური მოძრაობის“ წევრი გივი თარგამაძე ესაუბრა.

„მეტრონომი“: საუბარი კორცხელის ინციდენტით მინდა დავიწყოთ. როგორ ფიქრობთ  რამდენად ეფექტურია გამოძიება? შინაგან საქმეთა მინისტრის განცხადებაც მინდა შეგახსენოთ, მისი თქმით, სპორტსმენების დაკავების საფუძველი არ აქვთ…

გივი თარგამაძე: ეს სიცრუეა, რადგან ეს ადამიანები საჯარო სივრცეში, საკუთარ „ფეისბუქ“ გვერდებზე აქვეყნებენ სტატუსებს, სადაც ისმის პირდაპირი მუქარა გიგა ბოკერიას, ნიკა მელისა და თენგიზ გუნავას მიმართ.

აღმკვეთი ღონისძიების სახით წინასწარი პატიმრობის შერჩევის ერთ-ერთი საფუძველი არის სიტუაცია, როდესაც ეჭვმიტანილი აგრძელებს დანაშაულის ჩადენას და ამ ადამიანების შემთხვევაში ზუსტად ასე ხდება.

აქედან გამომდინარე, თავის ფეხით მივიდნენ თუ სხვა სახით, ისინი დაკავებას ექვემდებარებოდნენ. პროკურატურას სასამართლოში უნდა მოეთხოვა  აღკვეთის ღონისძიების სახით პატიმრობის გამოყენება. ცოტა ხნის წინ, ვიხილეთ პოლიციის შენობასთან ვიცე-პრემიერი როგორ აშანტაჟებდა პრემიერს. ეს იყო პირდაპირი შანტაჟი, როდესაც კალაძის სიძე გიგა გეგეშიძესთან და მთელ ამ კამპანიასთან ერთად ამბობდა,  თუ დაიჭერთ ამ ადამიანებს,  თავს დავიწვავო.

სამწუხაროდ, ამ შანტაჟს უმაღლესი ხელისუფლება დაექვემდებარა. ეს კი იმაზე მეტყველებს, თუ რა სიტუაციაა შიგნით მთავრობაში და მეორე, ამ საქციელის გამო სიმპათიები უმაღლესი ღვთაების, ბიძინა ივანიშვილსგან კალაძეს ეკუთვნის. ეს არის ერთადერთი მიზეზი რის გამოც ამ ადამიანებს არ იჭერენ.

– თქვენი აზრით, კალაძეს პროკურატურაში დაიბარებენ? თქვენი პარტიის ერთ-ერთმა წევრმა გარკვეული „ალტერნატივაც“ შემოგვთავაზა. ან კალაძეს დაიბარებენ პროკურატურაში, ან შოთაძეს მოუწევს დაკითხვაზე მისვლაო…

– სავარაუდოდ უფრო მეორე იქნება. შოთაძემ გააკეთა პირდაპირი განცხადება და მისი ეს განცხადება ალოგიკური იყო. შოთაძემ თქვა, რომ ბოკერიასა და მელიას დაკითხავენ. ანუ შინაგან საქმეთა სამინისტრომ უკვე დაკითხა ბოკერია და მელია… ეს ადამიანები უკვე არიან დაკითხულნი. შემთხვევის შემდეგ ეგრევე დაიკითხნენ.

შოთაძემ გადაჭრით თქვა, რომ კალაძეს არ დაკითხავენ. როგორ შეუძლია მთავარ პროკურორს ამტკიცოს წინასწარ ვიცე-პრემიერს დაკითხავენ თუ არა. იქნებ ამ დაკითხვების პერიოდში იკვეთება ამ პირის პირდაპირი კავშირი დანაშაულთან, მაშინ აპრიორი როგორ აცხადებს მთავარი პროკურორი კალაძეს არ დაიკითხება.

– ვის მითიტებას ასრულებდა შოთაძე მსგავსი განცხადებების გაკეთებისას?

– არცერთი მოქმედება ხელისუფლების წარმომადგენელთა მხრიდან ბიძინა ივანიშვილის მითითების გარეშე არ ხდება. სწორედ ამან გამოიწვია სახელმწიფო ინსტიტუტების კოლაფსი. იმის მიუხედავად, რას დაწერს ეს დიდი მწერალი, ივანიშვილს გარკვეული მითითებები უკვე გაცემული აქვს და ამის შესაბამისად იქცევა როგორც მთავარი პროკურორი, ასევე პრემიერ-მინისტრი.

– ხურჩაში საზღვართან მომხდარ მკვლელობაზეც მინდა გკითხოთ. როგორც იცით დეპუტატი თოფაძე ამ ფაქტს ცოტა უცნაურად გამოეხმაურა „ერთი კაცი მოხვდა და ამ დონეზე აყვანა საჭირო არ არის“… რამდენად ადეკვატურია საპარლემენტო უმრავლესობის დეპუტატის პოზიცია ე.წ საზღვართან მომხდარი მკვლელობის მიმართ?

– ზაქარეიშვილმა, მიუხედავად იმისა რომ შემდგომ ბოდიში მოიხადა, ზუსტად ანალოგიური განცხადება გააკეთა.

– თქვენი აზრით, ზაქარეიშვილის და თოფაძის განცხადებები იდენტური იყო?

– დიახ ზუსტად იგივე თქვა ზაქარეიშვილმაც. ასეთია კრემლის მესიჯი. ეს არის პირდაპირი გზავნილი კრემლიდან:  მართალია მოგიკალით კაცი, დროდადრო მსგავსი ფაქტები განმეორდება. თუმცა, თქვენ ეს არ უნდა გაბეროთ, უნდა გვიცეკვოთ, გვიმღეროთ, გვაპურმარილოთ და შემოგვთხოვოთ თქვენი არსებობა. ხელისუფლებაში მყოფი ეს მცირე ჯგუფი ამას იმეორებს. თოფაძის ეს განცხადება „ქართულ ოცნებაში“ არავის დაუგმია.

– ელისო ჩაფიძე გაემიჯნა ამ განცხადებას…

– ცალკეული შემთხვევები შესაძლოა არის, მაგრამ ეს საერთო სურათს არ ცვლის. მთავარია ხელისუფლების მოქმედებები. ისევ დაიგეგმა შეხვედრა აბაშიძე-კარასინის ფორმატში. მთავარია, ხურჩის  მიმართულებით როგორი საკადრო გადაადგილება განხორციელდა. (თარგამაძის კომენტარი ვალერი სიხარულიძის დანიშვნაზე), ყველაფერი მიდის ისევ ისე. თუ თოფაძის ნარატივს არ ეთანხმებიან პირველ რიგში აბაშიძე-კარასინის ფორმატის შეჩერება უნდა მომხდარიყო, როგორც ერთ-ერთი მთავარი ფაქტორისა, რომელმაც მკვლელობა გამოიწვია.

უნდა მოხდეს  ადეკვატური აპელირება საერთაშორისო არენაზე. არაფერი არ კეთდება, სწორედ ეს მაძლევს საფუძველს ვთქვა, რომ ხელისუფლება თოფაძის პოზიციას იზიარებს.

– მთავრობის წევრთა თქმით, გიგა ოთხოზორიას მკვლელობის საკითხს ჟენევის ფორმატში განიხილავენ. საგარეო საქმეთა სამინისტრომ ინფორმაცია მიაწოდა ეუთოსა და გაეროს წარმომადგენლებს…

– ვალი მოიხადეს. რამდენიმე მიმართვა გააკეთეს და ამით შემოიფარგლენ. მხოლოდ განცხადებები საკმარისი არ არის. მთავრობა ყველა ტრიბუნაზე, პირდაპირი გაგებით, განგაშის ზარებს უნდა სცემდეს.

– გიორგი ვაშაძის წასვლის საკითხზე მინდა გკითხოთ. ვაშაძემ წასვლის წინ გაგაკრიტიკათ. მისი თქმით, ახალ, ამბიციურ სახეებს პარტიაში განვითარების საშუალება არ ეძლევათ. მართლა არსებობს „ნაციონალურ მოძრაობაში“ ჩრდილოვანი მმართველობა? თქვენმა ყოფილმა თანაპარტიელმა კონკრეტული გვარებიც დაასახელა…

– ძალიან კარგია, რომ ვაშაძის განცხადებებიდან რამდენიმე დღეში პარტიამ განახლებული ათეული წარმოადგინა, რამაც მთლიანად მოხსნა მსგავსი ეჭვები. განახლების პრეტენზია ჯერჯერობით წარმოდგენილი პარტიებიდან მხოლოდ „ნაციონალურ მოძრაობას“ აქვს. ჩვენს პარტიაში წესებით და არა პიროვნული გადაწყვეტილებებით ხდება ადამიანების სიაში განლაგება. თუ ამ სივრცეში ადამიანმა პირადი ამბიციების გამო თავისი ადგილი ვერ იპოვა და ამის გამო პარტია დატოვა, აქ როგორც მინიმუმ უპასუხისმგებლობასთან გვაქვს საქმე. პარტიას მისი წასვლით დიდი დანაკლისი არ განუცდია.

– ახალი სახეები საკითხის ერთი მხარეა, უფრო  მნიშვნელოვანია, რამდენად მიიღებენ ეს ადამიანები გადაწყვეტილების მიღების პროცესში მონაწილეობას… ვაშაძე ამბობს, რომ განახლება ფასადურია და ბოკერია რამდენიმე ადამიანთან ერთად იღებს მონაწილეობას გადაწყვეტილების მიღების პროცესში..

– პარტიაში არსებობს წესები, რომელთა თანახმადაც გადაწყვეტილებები კოლექტიურად მიიღება.

– რა მოლოდი გაქვთ საპარლამენტო არჩევნებში. იმედი გაქვთ, რომ არჩევნებს მოიგებთ?

– აბსოლუტურად დარწმუნებული ვარ გამარჯვებაში. ჩვენ სწორედ გამარჯვებაზე ვმუშაობთ. ის ამომრჩეველი, რომლებიც გადაუწყვეტელებში ფიქსირდებიან მეტწილად ჩვენი ამომრჩეველია.

-პოლიტიკაში ახალი ძალა გამოჩნდა პაატა ბურჭულაძის სახით. მმართველმა ძალამ მის პარტიას „ნაციონალური მოძრაობის“ სატელიტი მალევე უწოდა. თქვენი აზრით რა შანსი აქვს ბურჭულაძის  პოლიტიკურ ძალას?

– ახალი განაცხადი იყო „ქართული ოცნებიდან“ ამის თქმა. მას შემდეგ რაც „ვუზრუნველყოფთ“ ჩვენი პოზიციის გატანას ამერიკის შეერთებულ შტატებსა და ევროპაში, თურმე  შეგვძლებია ქართულ პოლიტიკაშიც გვყავდეს სატელიტი პარტიები. ეს ასე არ არის. ბურჭულაძის პარტია ფორმირების სტადიაში მყოფი ძალაა, პირდაპირ გეტყვით, რომ ძალიან ეკლექტურია მისი შემადგენლობა. თუ არ ექნებათ  მხოლოდ დეკლარირებულ დონეზე ევროატლანტიკური მიმართულება, მაშინ პარტნიორებს ჩვენ მხოლოდ და მხოლოდ ვეძებთ, ხაზს ვუსვამ, პარტნიორებს და არა სატელიტებს. ისინი ახლა ებმებიან პოლიტიკურ პროცესში, მოგვიანებით გამოჩნდება რამდენად მისაღებია ეს პარტია საპარტნიოროდ „ნაციონალური მოძრაობისთვის.“

-თქვენს უშუალო კონკურენტად მოიაზრებთ?

– ყველაზე დიდი გამოცდილება ამ ქვეყანაში, ქვეყნის წინ წაყვანის, შეცდომების გამოცდილების ჩათვლით აქვს მხოლოდ „ნაციონალურ მოძრაობას“ და ნებისმიერ პოლიტიკურ ძალას, მით უმეტეს ახლად შექმნილს გაუჭირდება ჩვენს პარტიას კონკურენცია გაუწიოს.

მარიამ ვარადაშვილი

 

 

 

იტვირთბა....