სლოვაკეთის პრემიერ-მინისტრი რობერტ ფიცო ევროკომისიას მოუწოდებს, ყურადღებით დააკვირდეს სერბეთში საპარლამენტო არჩევნების შემდეგ განვითარებულ მოვლენებს. მისი განცხადებით, ქვეყანაში კანონის უზენაესობას საფრთხე ემუქრება. ფიცომ „ფეისბუქზე“ გამოქვეყნებულ ვიდეომიმართვაში განაცხადა, რომ სერბეთში შექმნილი პოლიტიკური ვითარება სლოვაკეთში 2020-2023 წლებში განვითარებულ მოვლენებს ჰგავს.
მისი მტკიცებით, იმ პერიოდში, როდესაც სლოვაკეთის მთავრობებს იგორ მატოვიჩი, ედუარდ ჰეგერი და ლუდოვიტ ოდორი ხელმძღვანელობდნენ, სისხლის სამართლის კანონმდებლობას პოლიტიკური ოპონენტების წინააღმდეგ იყენებდნენ.
ფიცოს განცხადებით, ევროკომისიამ პრევენციული ზომების სახით უნდა გააძლიეროს სერბეთში მიმდინარე მოვლენების მონიტორინგი.
„სერბ ოპოზიციონერ პოლიტიკოსებს საერთაშორისო დაცვის უფლება აქვთ, თუ კანონის უზენაესობის პრინციპები აღარ იმოქმედებს“, – განაცხადა ფიცომ.
სლოვაკეთის პრემიერ-მინისტრმა ევროკომისია წარსულში სლოვაკეთში განვითარებული მოვლენების უგულებელყოფაშიც დაადანაშაულა.
ფიცოს მოწოდება უკავშირდება სერბეთში ხელისუფლების შეცვლის შემდეგ ყოფილი მმართველი პარტიის წარმომადგენლების წინააღმდეგ დაწყებულ გამოძიებებს.
ცნობისთვის, პირველ ნოემბერს დააკავეს სერბეთის კრიმინალური პოლიციის ყოფილი ხელმძღვანელი მარკო კრიჩაკი და კიდევ ერთი მაღალი რანგის პოლიციელი. მათ სამსახურებრივი უფლებამოსილების ბოროტად გამოყენებას ედავებიან. მოგვიანებით დააკავეს ხელისუფლებასთან დაკავშირებული ბანკის მფლობელიც.
ამის გამო სერბეთის ყოფილი მმართველი პარტია პოლიტიკურ დევნაზე საუბრობს. სერბეთის ყოფილმა პრეზიდენტმა, ალექსანდრ ვუჩიჩმა ახალი პოლიტიკური ძალა რევოლუციურ ტერორში დაადანაშაულა. მისი პარტიის წარმომადგენლები ამტკიცებენ, რომ ხელისუფლების ცვლილების შემდეგ მათზე პოლიტიკური ზეწოლა ხორციელდება.
შეგახსენებთ, 2026 წლის 25 ოქტომბერს სერბეთში ვადამდელი საპარლამენტო არჩევნები გაიმართა. არჩევნებში სტუდენტური საპროტესტო მოძრაობის საფუძველზე შექმნილმა „სტუდენტურმა სიამ“ გაიმარჯვა. ამით დასრულდა ალექსანდარ ვუჩიჩის „სერბეთის პროგრესული პარტიის“ 14-წლიანი საპარლამენტო მმართველობა.

