ირანში იანვრის არეულობაში შეიარაღებული მონაწილეობისთვის სამი მამაკაცი ჩამოახრჩვეს.
სასამართლოს გადაწყვეტილებით, სამივე მათგანი დამნაშავედ იქნა ცნობილი აშშ-ისა და ისრაელის რეჟიმებთან თანამშრომლობაში, ირანის ეროვნული უსაფრთხოების წინააღმდეგ განხორციელებულ ოპერაციებში, მათ შორის „მოლოტოვის კოქტეილებისა“ და ხელნაკეთი ყუმბარების დამზადებასა და გამოყენებაში, საზოგადოებრივ და სამთავრობო ობიექტებზე თავდასხმასა და ელექტროქვესადგურის განადგურებაში, რათა კარაჯის ზოგიერთი ნაწილისთვის ელექტროენერგიის გათიშვა მომხდარიყო. მათი სასჯელი უზენაესმა სასამართლომ ძალაში დატოვა.
საქმეში 11 ბრალდებული ფიგურირებდა. გამოძიებამ დაადგინა, რომ ჯგუფს ორგანიზებას უწევდა და ხელმძღვანელობდა ავტოსარემონტო სახელოსნოს მფლობელი დივბანდი; მან ჯგუფში ნათესავები და თანამშრომლები გააწევრიანა, 8 და 9 იანვრის არეულობებამდე კი კოორდინაციის მიზნით შეხვედრებიც გამართა. დადგინდა, რომ კაზემი საკუთარი სახლის სარდაფში „მოლოტოვის კოქტეილებსა“ და ხელნაკეთ ყუმბარებს ამზადებდა, ხოლო ზანგანეჰმა გადამწყვეტი როლი შეასრულა ელექტროსადგურის ქვესადგურის საბოტაჟში. დანარჩენ რვა ბრალდებულს ხუთიდან-ათ წლამდე პატიმრობა მიესაჯა.
ამასთან, მიმდინარეობს იმ სამი პირის ქონების კონფისკაციის პროცესი, რომელთა მიმართაც სასიკვდილო განაჩენი აღსრულდა.