„ჰუალინგ ჯგუფის“ მიერ საქართველოში ახალი ავიაკომპანია დარეგისტრირდა, – აღნიშნულის შესახებ ინფორმაცია ეკონომიკის სამინისტროს პრესსამსახურმა გაავრცელა.
უწყების ცნობით, ახალი ავიაკომპანიის ბაზა საქართველოში იქნება, ადგილობრივი თანამშრომლები ეყოლება და რეგულარულ რეისებს საქართველოდან როგორც აზიის, ისე ევროპის ქვეყნების მიმართულებით შეასრულებს.
საქართველოს ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, ახალი ავიაკომპანიის შემოსვლა საქართველოს ავიაბაზარზე ძალიან მნიშვნელოვანია. როგორც ის ამბობს, აზიისა და ევროპის მიმართულებით რეისებს, სამომავლოდ, აშშ-ში პირდაპირი ფრენებიც დაემატება.
ეკონომიკის სამინისტროში აცხადებენ, რომ ახალი ავიაკომპანია რეისების შესრულებას „ბოინგ 737“ ტიპის ორი ბორტის მეშვეობით გეგმავს, რომელსაც მოგვიანებით „ბოინგ 777“ ტიპის თვითმფრინავიც დაემატება.