უკრაინის საგარეო საქმეთა სამინისტროს მონაცემებით, რუსეთის შეიარაღებულ ძალებში აფრიკის 37 ქვეყნიდან სულ მცირე 2 982 მოქალაქეა გადაბირებული, რომელთაგან 486 უკრაინის წინააღმდეგ ომში დაიღუპა.
უკრაინის ტერიტორიაზე ამჟამად აფრიკის 17 ქვეყნის 35 მოქალაქე იმყოფება ტყვედ. რეკრუტების უდიდესი ნაწილი მოდის ისეთი ქვეყნებიდან, როგორებიცაა კენია, ეგვიპტე, კამერუნი, განა, ნიგერია, უგანდა, ალჟირი და მალი. უკრაინის თავდაცვის სამინისტროს მთავარი სადაზვერვო სამმართველოს ცნობით, რუსეთის არმიაში სულ 28 000-ზე მეტი უცხოელი კონტრაქტორია იდენტიფიცირებული.
უკრაინული მხარის განცხადებით, რუსული სპეცსამსახურები უცხოელების ომში ჩასართავად მანიპულაციურ და იძულებით მეთოდებს იყენებენ, მათ შორისაა სამოქალაქო დასაქმების ან განათლების მიღების ყალბი დაპირებები; მაღალი ანაზღაურება; რუსეთის მოქალაქეობა და სხვა სოციალური შეღავათები; დეპორტაციისა და დაპატიმრების მუქარა, რის შედეგადაც მიგრანტებს იძულებით აწერინებენ ხელს რუსულენოვან სამხედრო კონტრაქტებზე.