უკრაინის პრეზიდენტი ვოლოდიმირ ზელენსკი პარტნიორებს ევროკავშირის სანქციების 21-ე პაკეტის დაუყოვნებლივ მიღებისა და ანტიბალისტიკური თავდაცვის გაძლიერებისკენ მოუწოდებს. განცხადება პრეზიდენტმა მას შემდეგ გააკეთა, რაც გასულ ღამეს რუსეთმა უკრაინის ქალაქებზე 135 დრონითა და 10 ბალისტიკური რაკეტით მასშტაბური იერიში მიიტანა, რის შედეგადაც ხარკოვსა და ჩერნიგოვში მშვიდობიანი მოქალაქეები დაშავდნენ, ხოლო კიევსა და სხვა რეგიონებში კრიტიკული ინფრასტრუქტურა დაზიანდა.
“ამ ღამით რუსებმა ჩვენს ქალაქებსა და დასახლებებზე 135 დრონი და 10 სხვადასხვა ტიპის რაკეტა გაუშვეს, რომელთა უმეტესობა ბალისტიკური იყო. ხარკოვის რეგიონში დარტყმების შედეგად შვიდი ადამიანი დაშავდა, მათ შორის ერთი ბავშვი. დაზიანდა ჩვეულებრივი საცხოვრებელი შენობები, ბენზინგასამართი სადგური და რკინიგზის ინფრასტრუქტურა. ჩერნიგოვის რეგიონში სამი ადამიანი დაშავდა. რუსებმა დააზიანეს საცხოვრებელი შენობა და ელექტროქსელის ობიექტები, რის შედეგადაც ათასობით ოჯახი ელექტროენერგიის გარეშე დარჩა. ამჟამად მიმდინარეობს აღდგენითი სამუშაოები, რათა მოსახლეობას რაც შეიძლება სწრაფად აღუდგეს ელექტროენერგია. ზაპოროჟიეში საცხოვრებელი კორპუსი დაზიანდა.
რუსებმა კიევი ბალისტიკური რაკეტებით დაბომბეს. დედაქალაქში 16 ობიექტი დაზიანდა, მათ შორის ჩვეულებრივი სკოლა და საწარმო. მათ ასევე დაარტყა კრიტიკულ ინფრასტრუქტურას დნეპრის, დონეცკის, ჟიტომირის და ოდესის რეგიონებში.
რუსეთზე მეტი ზეწოლა უნდა იყოს. დროის დაკარგვა არ შეიძლება და ევროკავშირის სანქციების 21-ე პაკეტი ამ კვირაში უნდა იქნას მიღებული. სანქციების შესახებ გადაწყვეტილებების ყოველი დღე რუსეთისთვის დამატებით დროს ნიშნავს სანქციებისთვის მოსამზადებლად. ყველა კომპონენტი – ჩიპები, მიკროსქემები, ორმაგი დანიშნულების საქონელი – ყველაფერი, რასაც რუსეთი ომის გასაგრძელებლად და ადამიანებზე თავდასხმისთვის იყენებს, უნდა შეწყდეს. ჩვენი შეთანხმებები პარტნიორებთან ევროპულ ანტიბალისტიკური რაკეტების შესახებ არის ის, რაც ნამდვილად გაზრდის ჩვენი ხალხის უსაფრთხოებას. ჩვენ ერთად უნდა ვიმოქმედოთ – ყველა კომპანია და ყველა ქვეყანა უნდა იყოს სიცოცხლის ნამდვილი დამცველი. არსებობს საკმარისი საერთო შესაძლებლობები და ერთად შეგვიძლია ავაშენოთ ჭეშმარიტად საიმედო დაცვა უკრაინისა და მთელი ევროპისთვის. მადლობა ყველას, ვინც დაგვეხმარება.” – ნათქვამია უკრაინის პრეზიდენტის მიმართვაში, გასულ ღამეს ოკუპანტების თავდასხმებთან დაკავშირებით.