უკრაინის უსაფრთხოების სამსახურმა და გენერალურმა პროკურატურამ რუსეთის გენშტაბის უფროსის, ვალერი გერასიმოვის წინააღმდეგ ომის დანაშაულების ფაქტებზე სისხლის სამართლის საქმე აღძრეს. ბრალდება უკავშირდება უკრაინის სამოქალაქო ინფრასტრუქტურაზე მასირებულ საჰაერო თავდასხმებს, მათ შორის 2 ივლისის დარტყმებს კიევზე, რაც ჟენევის კონვენციების დარღვევად ფასდება.
საქმე აღიძრა უკრაინის სისხლის სამართლის კოდექსის 438-ე მუხლის მე-2 ნაწილით, რაც ომის კანონებისა და ჩვეულებების დარღვევას და ამგვარი ბრძანებების გაცემას გულისხმობს. უკრაინის სპეცსამსახურების განცხადებით, სწორედ გერასიმოვმა გასცა ბრძანება 2 ივლისს კიევის საცხოვრებელ კორპუსებსა და სამოქალაქო ინფრასტრუქტურაზე დარტყმების განხორციელების შესახებ.