საფრანგეთის სამხედრო-საზღვაო ძალებმა რუსეთის „ჩრდილოვანი ფლოტის“ ტანკერი დააკავეს, – ინფორმაციას საფრანგეთის პრეზიდენტი, ემანუელ მაკრონი ავრცელებს.
ემანუელ მაკრონის ცნობით, საფრანგეთის სამხედრო-საზღვაო ძალებმა ტანკერი Deliver-ი დააკავეს, რომელიც სიცილიის სანაპიროსთან საერთაშორისო საზღვაო სამართლის დარღვევით გადაადგილდებოდა.
„აღნიშნული მოქმედება „ჩრდილოვანი ფლოტის“ წინააღმდეგ დიდი ბრიტანეთის მიერ ჩატარებული მსგავსი ოპერაციიდან რამდენიმე დღეში განხორციელდა. ეს ევროპელების სიმტკიცეს აჩვენებს“, – წერს მაკრონი X-ზე და ტანკერის დაკავების ვიდეოკადრებს ავრცელებს.
მისი თქმით, ევროპა „ჩრდილოვან ფლოტს“ სანქციებისთვის გვერდის ავლისა და რუსეთის სამხედრო ძალისხმევის დაფინანსების საშუალებას არ მისცემს.