ტაილანდის პრინცესა ბაჯრაკიტიაბჰა, რომელიც სამ წელზე მეტი ხნის განმავლობაში კომაში იმყოფებოდა, 47 წლის ასაკში გარდაიცვალა, – ინფორმაციას BBC-ი ტაილანდის სამეფო კარზე დაყრდნობით ავრცელებს.
პრინცესა ბაჯრაკიტიაბჰამ 2022 წლის დეკემბერში ძაღლების ვარჯიშის დროს გონება დაკარგა. ექიმების ინფორმაციით, ეს გულში მიკოპლაზმური ინფექციით იყო გამოწვეული.
BBC-ი წერს, რომ პრინცესა ბაჯრაკიტიაბჰა მეფე ვაჯირალონგკორნის შვიდი შვილიდან უფროსი იყო და მისი გარდაცვალებით, ტაილანდის სამეფო ოჯახმა დაკარგა ადამიანი, რომელსაც შესაძლოა გადამწყვეტი როლი ეთამაშა სამეფო ტახტის ჯერ კიდევ გაურკვეველ მემკვიდრეობაში.
პრინცესა ბაჯრაკიტიაბჰა პროფესიით იურისტი იყო. ის გარკვეული დროის განმავლობაში მუშაობდა ნიუ-იორკში, გაერთიანებული ერების ორგანიზაციაში ტაილანდის მისიაში. შემდეგ კი ტაილანდში დაბრუნდა და ბანგკოკსა და ქვეყნის სხვა ადგილებში გენერალური პროკურორის ოფისებში მუშაობდა.
2012 წლიდან 2014 წლამდე ის იყო ტაილანდის ელჩი ავსტრიაში, სადაც მან ურთიერთობა დაამყარა გაეროს ნარკოტიკებისა და დანაშაულის წინააღმდეგ ბრძოლის ოფისთან (UNODC).
ტაილანდში დაბრუნების შემდეგ, ის გახდა გაეროს ნარკოტიკებისა და დანაშაულებების კომისიის ელჩი სამხრეთ-აღმოსავლეთ აზიაში კანონის უზენაესობის საკითხებში და განაგრძო ტაილანდის სისხლის სამართლის სისტემის რეფორმის მხარდაჭერა.
2021 წელს მამამისმა ის პირადი დაცვის შტაბის უფროსად დანიშნა და გენერლის წოდება მიანიჭა.
73 წლის მეფე ვაჯირალონგკორნს ჯერ მემკვიდრე არ დაუსახელებია. ტაილანდური ტრადიციის თანახმად, მემკვიდრე მამაკაცი უნდა იყოს, თუმცა კონსტიტუციაში 1974 წელს შეტანილი შესწორებით ტახტზე ქალის ასვლაა შესაძლებელი გახდა.