ბულგარეთის პარლამენტმა მთავრობის ახალი შემადგენლობა დაამტკიცა. ინფორმაციას ამის შესახებ ბულგარეთის მედია ავრცელებს.
პრემიერ-მინისტრის თანამდებობაზე ყოფილი პრეზიდენტი რუმენ რადევი დაინიშნა, რომელიც, როგორც მედია წერს, პრორუსული შეხედულებებითაა ცნობილი. საგარეო საქმეთა მინისტრად ველისლავა პეტროვა-ჩამოვა დაინიშნა, თავდაცვის მინისტრად კი დიმიტარ სტოიანოვი.
პრემიერ-მინისტრის კანდიდატურას და მინისტრთა საბჭოს სტრუქტურას 124 დეპუტატმა დაუჭირა მხარი. ყველა მათგანი „პროგრესული ბულგარეთის“ ფრაქციის წარმომადგენლები არიან.
გადაწყვეტილების საწინააღმდეგოდ ხმა 70 დეპუტატმა მისცა, ხოლო 36-მა ხმის მიცემისგან თავი შეიკავა.
ახლად არჩეულმა პრემიერმა, ვიცე-პრემიერებმა და მინისტრებმა ფიცი უკვე დადეს.
ცნობისთვის, ბულგარეთში 19 აპრილს ჩატარებულ საპარლამენტო არჩევნებში ხმების 44,59% „პროგრესულმა ბულგარეთმა“ მოიპოვა. მათ პარლამენტში ერთპარტიული უმრავლესობა ექნებათ. რუმენ რადევი ბულგარეთის პრეზიდენტი 2017 წლიდან 2026 წლამდე იყო.