აშშ-სა და ირანს შორის მზარდი დაძაბულობის მიუხედავად, ცეცხლის შეწყვეტის შესახებ არაპირდაპირი მოლაპარაკებები კვლავ მიმდინარეობს, – „ესოშიეთიდ პრესის“ თანახმად, ამის შესახებ ორმა პაკისტანელმა ოფიციალურმა პირმა განაცხადა.
გავრცელებული ცნობით, პაკისტანის უმაღლესი პოლიტიკური და სამხედრო ხელმძღვანელობა აგრძელებს შუამავლობას შეერთებულ შტატებსა და ირანს შორის.
ირანის საგარეო საქმეთა მინისტრი აბას არაღჩი სავარაუდოდ დღეს საღამოს პაკისტანის დედაქალაქ ისლამაბადში ჩავა, ომანში მოკლე ვიზიტის შემდეგ, რაც ბოლო ორი დღის განმავლობაში მეორე ვიზიტი იქნება.
არაღჩი 25 აპრილს ისლამაბადში იმყოფებოდა და რეგიონული კონფლიქტის დასრულების შესახებ თეირანის პოზიცია გააცნო პაკისტანის პრემიერ-მინისტრს, შეჰბაზ შარიფს, არმიის მთავარსარდალს, ფელდმარშალ ასიმ მუნირს, საგარეო საქმეთა მინისტრს, იშაკ დარსა და სხვა მაღალჩინოსნებს.