გერმანია ხმელთაშუა ზღვაში გემებს აგზავნის ჰორმუზის სრუტეში შესაძლო განლაგებისთვის მოსამზადებლად, – ამის შესახებ გერმანიის თავდაცვის მინისტრმა, ბორის პისტორიუსმა განაცხადა.
გერმანიის თავდაცვის უწყების ხელმძღვანელის თქმით, განლაგდება გამნაღმველი ხომალდი და სამეთაურო-მომარაგების გემი, თუმცა გემების გამგზავრების ვადები არ დაუკონკრეტებია.
პისტორიუსის განცხადებით, ნებისმიერი განლაგების წინაპირობები იქნება ცეცხლის მდგრადი შეწყვეტა, საერთაშორისო სამართლის შესაბამისად სამართლებრივი ჩარჩო და ბუნდესტაგის, გერმანიის პარლამენტის ქვედა პალატის, მანდატი.
პისტორიუსმა ხაზი გაუსვა გერმანიის საზღვაო ფლოტის შესაძლებლობებს განაღმვის საკითხში და აღნიშნა, რომ ქვეყანა ნატო-ში ტრადიციულად წამყვან როლს ასრულებს ამ სფეროში.