პრეზიდენტ მადუროს ადვოკატის განცხადებით, აშშ-ის მთავრობის ქმედებების გამო, მის კლიენტს უარი ეთქვა ადვოკატის არჩევის უფლებაზე. ვენესუელის გატაცებულმა პრეზიდენტმა, ნიკოლას მადურომაც, სთხოვა ამერიკელ მოსამართლეს, მოხსნას ტრამპის ადმინისტრაციის მიერ მის წინააღმდეგ წაყენებული ნარკოტრაფიკინგის ბრალდებები და ამტკიცებს, რომ ვაშინგტონი საბოტაჟს უწყობს მისი თავდაცვის კონსტიტუციურ უფლებას.
ხუთშაბათს მადუროს იურიდიულმა გუნდმა განაცხადა, რომ საქმე უნდა შეწყდეს, რადგან აშშ-ის მთავრობამ ვენესუელის ხელისუფლებას დაუბლოკა საშუალება, დაეფარა გატაცებული პრეზიდენტისა და მისი მეუღლის იურიდიული ხარჯები. თანხების დაბლოკვით, აშშ-ის ადმინისტრაცია „ერევა მისტერ მადუროს შესაძლებლობაში, დაიქირაოს ადვოკატი და, შესაბამისად, არღვევს მისი მეექვსე შესწორებით გარანტირებულ უფლებას — აირჩიოს სასურველი დამცველი“, — აღნიშნა მადუროს ადვოკატმა, ბარი პოლაკმა, მანჰეტენის ფედერალურ მოსამართლესთან წარდგენილ სარჩელში.
პოლაკის თქმით, აშშ-ის კონსტიტუციის მეექვსე შესწორებით გათვალისწინებულ უფლებაში ჩარევა ბრალდებების მოხსნას მოითხოვს.
მადურო და მისი მეუღლე, სილია ფლორესი, ნიუ-იორკში გირაოს გარეშე იმყოფებიან პატიმრობაში მას შემდეგ, რაც 3 იანვარს, აშშ-ის სამხედრო ძალების მიერ განხორციელებული სისხლიანი ღამის რეიდის დროს, ისინი საკუთარი სახლიდან აიყვანეს.
ამერიკელი პროკურორები ამტკიცებენ, რომ მადურომ ბოროტად გამოიყენა ძალაუფლება ნარკოტრაფიკერების დასახმარებლად, ხოლო მისი მეუღლე ამ დანაშაულებში თანამონაწილე იყო.
ორივე მათგანი კატეგორიულად უარყოფს ბრალს და აცხადებს, რომ უდანაშაულოა.
ცნობისთვის: 2026 წლის 3 იანვარს, ამერიკის შეერთებული შტატების სამხედრო ძალებმა ვენესუელაში სპეცოპერაცია ჩაატარეს, რის შედეგადაც პრეზიდენტი ნიკოლას მადურო და მისი მეუღლე საკუთარ სახლში დააკავეს. ამჟამად მადურო ნიუ-იორკის ციხეში იმყოფება და მას ბრალად ნარკოტრაფიკინგში მონაწილეობა ედება. ეს პირველი შემთხვევაა ისტორიაში, როდესაც აშშ-მა მოქმედი სახელმწიფოს მეთაური სამხედრო გზით დააკავა და მის წინააღმდეგ სისხლისსამართლებრივი დევნა დაიწყო.