აშშ-ის წარმომადგენელთა პალატის ზედამხედველობის კომიტეტი, რომელსაც რესპუბლიკელები ხელმძღვანელობენ, ეპშტეინის საქმის ფარგლებში ჰილარი და ბილ კლინტონების დაკითხვას იწყებს. ინტერვიუები ჩაპაკუაში, კლინტონების რეზიდენციაში, დახურულ კარს მიღმა გაიმართება: ხუთშაბათს ჩვენებას ჰილარი კლინტონი მისცემს, ხოლო პარასკევს – ყოფილი პრეზიდენტი ბილ კლინტონი.
ეს შეხვედრები ხანგრძლივი და მწვავე სამართლებრივი დავის შედეგია. კომიტეტის თავმჯდომარე, ჯეიმს კომერი, კლინტონებს გამოძიებისთვის „გვერდის ავლის მცდელობაში“ ადანაშაულებს და მათ წინააღმდეგ კონგრესის უპატივცემულობის გამო სანქციების დაწესებითაც იმუქრებოდა. მიუხედავად იმისა, რომ კლინტონები საჯარო მოსმენაზე გამოსვლას ითხოვდნენ, კომიტეტმა დახურული ფორმატი არჩია, რაც მოწმეებთან მუშაობის სტანდარტული პროცედურით ახსნა.
ჰილარი კლინტონი ბრალდებებს პოლიტიკურად მოტივირებულს უწოდებს. მისი თქმით, რესპუბლიკელები ამ პროცესს იყენებენ, რათა ყურადღება გადაიტანონ დონალდ ტრამპის კავშირებზე ჯეფრი ეპშტეინთან.
„ჩვენ მზად ვიყავით წერილობითი ჩვენებების მისაცემად, როგორც ეს სხვა მოწმეებმა გააკეთეს. ჩვენი ამ საქმეში ჩართვა მხოლოდ პრეზიდენტ ტრამპისგან ყურადღების გადატანის მცდელობაა,“ — განაცხადა მან BBC-სთან ინტერვიუში.
კლინტონები კატეგორიულად უარყოფენ რაიმე სახის დანაშაულებრივ კავშირს ეპშტეინთან, რომელიც 2019 წელს ციხეში გარდაიცვალა.