ჩრდილოეთ კორეის ლიდერმა, კიმ ჩენ ინმა, სამხრეთ კორეასთან დიალოგის კარი ჩაკეტა და განაცხადა, რომ მის ძალებს შეუძლიათ “სრულად გაანადგურონ” სამხრეთელი მეზობელი. ამავდროულად, მან მიანიშნა, რომ შეერთებულ შტატებთან მომავალი დიალოგისთვის ვაშინგტონმა უარი უნდა თქვას ფხენიანის მიმართ „მტრულ“ პოლიტიკაზე.
„თუ ვაშინგტონი პატივს სცემს ჩვენი ქვეყნის ამჟამინდელ სტატუსს, როგორც ეს კონსტიტუციით არის დადგენილი… და შეწყვეტს თავის მტრულ პოლიტიკას… არ არსებობს მიზეზი, რის გამოც ჩვენ არ შეგვიძლია კარგად ვთანამშრომლობდეთ შეერთებულ შტატებთან“, — განაცხადა კიმმა ოთხშაბათს, როდესაც ქვეყანამ დაასრულა მმართველი „კორეის შრომის პარტიის“ (WPK) მნიშვნელოვანი შეხვედრების კვირეული. ჩრდილოეთ კორეის ოფიციალური საინფორმაციო სააგენტოს (KCNA) ხუთშაბათის ანგარიშის თანახმად, კიმმა ასევე მოუწოდა ახალი შეიარაღების სისტემების შემუშავებისკენ, რათა გააძლიეროს თავისი ბირთვული არმია.
KCNA-ს ცნობით, კიმმა დააკონკრეტა ისეთი შეიარაღება, როგორიცაა კონტინენტთაშორისი ბალისტიკური რაკეტები, რომელთა გაშვება წყალქვეშა ნავებიდან არის შესაძლებელი, და ტაქტიკური ბირთვული იარაღის გაფართოებული არსენალი — მათ შორის არტილერია და მოკლე მანძილზე მოქმედი რაკეტები, რომლებსაც სამხრეთ კორეის მიზანში ამოღება შეუძლიათ.
მან ასევე აღნიშნა, რომ ბოლო წლებში ფხენიანის ბირთვული და სარაკეტო პროგრამების დაჩქარებულმა განვითარებამ „სამუდამოდ განამტკიცა“ ქვეყნის სტატუსი, როგორც ბირთვული სახელმწიფოსი.
„ჩვენი, როგორც ბირთვული ქვეყნის სტატუსი, მნიშვნელოვან როლს ასრულებს მტრის პოტენციური საფრთხეების შეკავებასა და რეგიონული სტაბილურობის შენარჩუნებაში“, — თქვა კიმმა და ქვეყნის ბირთვულ იარაღს მისი უსაფრთხოებისა და ინტერესების „გარანტია და დამცავი მექანიზმი“ უწოდა.