გერმანიის კანცლერმა, ფრიდრიხ მერცმა ბერლინის მიერ ბირთვული ენერგიის გამოყენების შეწყვეტას “სერიოზული სტრატეგიული შეცდომა” უწოდა.
ოთხშაბათს, საქსონია-ანჰალტში გამართულ ბიზნესკონფერენციაზე სიტყვით გამოსვლისას მერცმა ქვეყნის ბოლო ატომური რეაქტორების ნაჩქარევად გათიშვის გამო წინა მთავრობების, მათ შორის, ანგელა მერკელის პოლიტიკა გააკრიტიკა.
“ბირთვული ენერგიიდან გამოსვლა სერიოზული სტრატეგიული შეცდომა იყო. თუ ამ ნაბიჯს დგამდი, მინიმუმ სამი წლის წინ გერმანიაში დარჩენილი ბოლო ატომური ელექტროსადგურები მაინც უნდა შეგვენარჩუნებინა ქსელში, რათა ელექტროენერგიის წარმოების იგივე სიმძლავრე გვქონოდა.
ჩვენ ახლა ვახორციელებთ ყველაზე ძვირადღირებულ ენერგეტიკულ ტრანზიციას მთელ მსოფლიოში. მე არ მეგულება მეორე ქვეყანა, რომელიც საკუთარ თავს საქმეს ისე გაურთულებდა და გაუძვირებდა, როგორც ამას გერმანია აკეთებს. ჩვენ დავისახეთ მიზანი, რომელიც ახლა უნდა შევასწოროთ, მაგრამ ჩვენ უბრალოდ არ გაგვაჩნია ენერგიის წარმოების საკმარისი სიმძლავრე”. – თქვა მერცმა.
ამასთან, მერცმა გერმანიის მწვანეთა პარტიაც გააკრიტიკა, რადგან მისი შეფასებით, ისინი “იდეოლოგიურად მოტივირებულ” ენერგეტიკული პოლიტიკას ატარებდნენ, რაც არაეფექტური და ძალიან ძვირი იყო.
გერმანიამ ბოლო სამი ბირთვული რეაქტორი 2023 წლის აპრილში გათიშა. ქვეყანამ ბირთვულ ენერგიაზე ეტაპობრივი უარის თქმის გადაწყვეტილება 2011 წელს, იაპონიაში მომხდარი ფუკუშიმას კატასტროფის შემდეგ მიიღო.