პოლონეთი უკრაინას დრონების ტექნოლოგიების სანაცვლოდ, ცხრა MiG-29 გამანადგურებელს გადასცემს | ამის შესახებ უკრაინული მედია წერს, რომ MIG-29-ის ავიაგამანადგურებელს პოლონეთი უკრაინას დრონების ტექნოლოგიების სანაცვლოდ გადასცემს. პოლონეთის თავდაცვის მინისტრის მოადგილემ პაველ ზალევსკიმ ამის შესახებ TVP-ის გადაცემა World On the Record-თან ექსკლუზიურ ინტერვიუში განაცხადა.
“ჩვენ ველოდებით უკრაინის თავდაცვის სამინისტროს პასუხს. მიმდინარეობს მოლაპარაკებები… ეს წმინდა ტექნიკური განხილვებია“ -თქვა ზალევსკიმ.
კითხვაზე, დათანხმდა თუ არა უკრაინა პოლონეთის შეთავაზების მიღებას, ზალევსკიმ უპასუხა, რომ კიევი თანახმაა.
“მე მჯერა… რომ უკრაინელებმა გადაწყვიტეს ამ წინადადების მიღება. რა თქმა უნდა, როგორც ყოველთვის, არის გარკვეული ტექნიკური ასპექტები, რომლებიც დაზუსტებას საჭიროებს“ – თქვა მან და დასძინა, რომ პირველი პარტია „ათზე ნაკლებ“ თვითმფრინავს მოიცავს.
ზალევსკიმ ხაზგასმით აღნიშნა, რომ MiG-29 გამანადგურებლების გადაცემის ტექნიკური დეტალები, მათ შორის ლოჯისტიკა და ტექნიკური მომსახურება, ამჟამად შეთანხმების პროცესშია.
პრეზიდენტმა ვოლოდიმირ ზელენსკიმ განაცხადა, რომ ეს თვითმფრინავები მნიშვნელოვანია, რადგან უკრაინელმა პილოტებმა იციან მათი მართვა. მან ხაზგასმით აღნიშნა, რომ „პრობლემა არა თვითმფრინავების, არამედ პილოტების დეფიციტია“. მისი თქმით, F-16-ისთვის პილოტის მომზადებას 8 თვიდან წელიწადნახევრამდე სჭირდება, ხოლო უკრაინელ პილოტებს შეუძლიათ MiG-29-ზე დაუყოვნებლივ იბრძოლონ.
მოსალოდნელია, რომ ავიაგამანადგურებლების გადაცემა NATO-ს საერთო პოლიტიკის ნაწილი იქნება, რომელიც ალიანსის აღმოსავლეთ ფლანგის გაძლიერებასა და უკრაინის მხარდაჭერას ისახავს მიზნად. მწყობრიდან გამოსული MiG-29-ების ამოცანებს უფრო თანამედროვე F-16 და FA-50 თვითმფრინავები აიღებენ.