მობილიზაციის პროცესში გაცილებით ფართო ცვლილებებია საჭირო, რაც უკრაინის თავდაცვისთვის მეტ შესაძლებლობებს უზრუნველყოფს – აღნიშნულის შესახებ უკრაინის პრეზიდენტმა, ვოლოდიმირ ზელენსკიმ უკრაინის ახლად დანიშნულ თავდაცვის მინისტრთან, მიხაილ ფედოროვთან შეხვედრის შემდეგ განაცხადა.
“მთავარია საჰაერო თავდაცვა. არსებობს კონკრეტული გადაწყვეტილებები, რომლებიც რაც შეიძლება სწრაფად უნდა განხორციელდეს. მეორე პრიორიტეტია ტექნოლოგიური კომპონენტის მნიშვნელოვნად გაძლიერება სამხედროებთან კოორდინაციით, რათა შეჩერდეს რუსი ოკუპანტების წინსვლა ბრძოლის ველზე; ასევე, გადაწყდეს ფრონტის ხაზის ლოგისტიკასთან დაკავშირებული პრობლემური საკითხები. კერძოდ, ჩატარდება თავდაცვის სექტორის დაფინანსების დაჩქარებული აუდიტი. მიხაილის ხელმძღვანელობა წარმოადგენს არსებული დეფიციტის მოგვარების გზებს. ასევე მზადდება გადაწყვეტილებები ფრონტის ხაზზე მყოფი ჩვენი მეომრებისთვის ხელფასების გაზრდის შესახებ; მესამე, უკრაინის თავდაცვის სამინისტრო შემოგვთავაზებს სისტემურ გადაწყვეტილებებს იმ პრობლემებისთვის, რომლებიც დაგროვდა ტერიტორიული გაწვევის ცენტრებში. საბრძოლო ბრიგადებს შორის პერსონალის უფრო სამართლიანი განაწილების უზრუნველსაყოფად უკვე მიღებულია გადაწყვეტილებები. თუმცა მობილიზაციის პროცესში გაცილებით ფართო ცვლილებებია საჭირო, რაც უზრუნველყოფს მეტ შესაძლებლობებს როგორც უკრაინის თავდაცვისა და უსაფრთხოების ძალებისთვის, ასევე ჩვენი სახელმწიფოს ეკონომიკური პროცესებისთვის“, – წერს ვოლოდიმირ ზელენსკი.